کوہاٹ(این این آئی)نیشنل ہائی وے اتھارٹی (این ایچ ا ے)نے تین ماہ کے دوران ایک بار پھر ملک بھر میں ہائی ویز اور موٹرویز نیٹ ورک پر ہر قسم کی گاڑیوں کے ٹول ٹیکس میں بڑا اضافہ کردیا جو یکم اکتوبر سے نافذالعمل ہوجائے گا۔

اس ضمن میں این ایچ اے نے ایک نوٹیفیکیشن جاری کردیا ہے جس کے مطابق قومی شاہراہوں پر موٹرکارکا ٹول ٹیکس 40 روپے سے بڑھا کر50 روپے‘ ویگن کا ٹیکس 70 روپے سے 90روپے‘بس کا ٹیکس 130 روپے سے 170 روپے‘ عام ٹرک کا ٹیکس 160 روپے سے 210 روپے جبکہ بڑے ٹرک کا ٹول ٹیکس 350 روپے سے 460 روپے کردیا گیاہے۔

انڈ س ہائی وے(N-55) پر واقع کوہاٹ ٹنل کے ٹول ٹیکس میں بھی اضافہ کردیا گیا ہے جہاں موٹرکا رکا ٹول ٹیکس 100 روپے سے130 روپے ‘ ویگن کا ٹیکس 320 روپے سے420روپے‘بس اور ٹرک کا ٹیکس 400 روپے سے 520 روپے جبکہ بڑے ٹرک کا ٹول ٹیکس 600 روپے سے 780 روپے کردیا گیاہے۔

اسی طرح اسلام آباد پشاور موٹر وے(ایم ون) پر بھی تقریباً30 فیصدسے زائد کا اضافہ کرکے ٹول ٹیکس بڑھا دیا گیا ہے جہاں موٹرکار کا ٹول ٹیکس 350 روپے سے 460 روپے’ 12 نشست والی ویگن کا ٹیکس 550 روپے سے بڑھا کر 720 روپے ‘ 13 سے24 سیٹوں والی کوسٹر؍منی بس کا ٹیکس210 روپے اضافہ کے ساتھ 910 روپے کردیا گیا ہے۔بس کے ٹیکس میں تین سو روپے کا اضافہ کرکے نیا ٹیکس 1300 روپے‘ ٹرک کا ٹیکس 1300 سے 1690 روپے جبکہ بڑے ٹرک کا ٹول ٹیکس 1500 روپے سے بڑھا کر 1950 روپے کردیا گیا ہے۔

نوٹیفیکیش کے مطابق ایم تھری موٹر وے لاہور عبدالحکیم ‘ ایم فور پنڈی بھٹیاں فیصل آباد ملتان موٹر وے‘ ایم فائیو ملتان سکھر موٹر وے پر بھی ہر قسم کی گاڑیوں کے ٹول ٹیکس میں 16 فیصد سے 31 فیصد کا اضافہ کردیا ہے۔اسی طرح ہکلہ ڈیرہ اسماعیل خان (ایم 14 ) موٹر وے پر بھی مختلف گاڑیوں کے ٹول ٹیکس میں تقریباً5 فیصد اضافہ کردیا گیا ہے۔اعلامیہ کے مطابق حسن ابدال حویلیاں مانسہرہ ایکسپریس وے ( (E-35 پر بھی گاڑیوں کے ٹول ٹیکس میں 30 فیصد تک اضافہ کردیا گیا ہے ۔ یادرہے کہ تین ماہ قبل جولائی میں بھی این ایچ اے نے گاڑیوں کے ٹول ٹیکس بڑھا کر شہریوں کی مشکلات میں اضافہ کر دیاتھا۔