اسلام آباد(این این آئی)صدر مملکت آصف علی زرداری، وزیراعظم شہباز شریف، وزیراعلیٰ پنجاب وبلوچستان،وزیرداخلہ سمیت دیگر سیاسی رہنماؤں نے پنجگورمیں مزدوروں کے بہیمانہ قتل کی شدید مذمت کرتے ہوئے کہا کہ غم کی اس گھڑی میں سوگوار خاندان کے ساتھ کھڑے ہیں۔
صدر پاکستان آصف علی زرداری نے پنجگور میں مزدوروں کے بہیمانہ قتل کی شدید مذمت کرتے ہوئے قیمتی جانی نقصان پر گہرے دکھ اور افسوس کا اظہار کیا۔انہوں نے جاں بحق افراد کے لواحقین کے ساتھ تعزیت کا اظہار کرتے ہوئے واقعے کے زخمیوں کی جلد صحتیابی کی دعا کی۔آصف زرداری نے نہتے مزدوروں کو نشانہ بنانے والے دہشتگردوں کیخلاف موثر کارروائی پر زور دیتے ہوئے کہا کہ بے گناہ مزدوروں، عام شہریوں کو نشانہ بنانا انتہاہی سفاکانہ اور قابل مذمت فعل ہے۔
وزیراعظم شہباز شریف نے مزدوروں کے قتل کی مذمت کرتے ہوئے وزیراعلی بلوچستان سے واقعے کی رپورٹ طلب کرلی جب کہ زخمی مزدوروں کو ہرممکن طبی امداد فراہم کرنے کی ہدایت کی۔انہوں نے مقتولین کی بلند درجات کیلئے دعا کی اور اہل خانہ سے تعزیت کا اظہار کرتے ہوئے کہا کہ معصوم بیگناہ مزدور علاقے میں گھرکی تعمیرکاکام کررہے تھے، مزدوروں پر حملوں کے بہیمانہ واقعات کی جتنی مذمت کی جائے کم ہے۔وزیراعظم شہباز شریف نے کہاکہ محنت کشوں اور مزدوروں پر حملوں کے بہیمانہ واقعات کی جتنی مذمت کی جائے کم ہے۔
شہباز شریف نے مقتولین کی درجات بلندی کی دعا اور اہلخانہ سے اظہارِ تعزیت کیا۔انہوں نے زخمی مزدوروں کی جلد صحت یابی کی دعا کی اور ہر ممکن طبی امداد فراہم کرنے کی ہدایت بھی کی ہے۔شہباز شریف نے کہا ہے کہ یہ معصوم اور بے گناہ مزدور پنجگور کے علاقے خدابدان میں گھر کی تعمیر پر مزدوری کر رہے تھے۔وزیراعظم کا کہنا ہے کہ سر زمین پاک سے ہر قسم کی دہشت گردی کو جڑ سے اکھاڑ پھینکنے کے لیے پرعزم ہیں۔وزیر داخلہ محسن نقوی نے واقعے کی مذمت کرتے ہوئے کہا کہ تمام ہمدردیاں جاں بحق مزدوروں کے لواحقین کے ساتھ ہیں، غم کی اس گھڑی میں سوگوارخاندان کے ساتھ کھڑے ہیں۔
انہوں نے زخمی مزدور کیلئے جلد صحت یابی کی دعا کرتے ہوئے کہا کہ بیگناہ مزدوروں پر فائرنگ کرنے والے عناصر کسی رعایت کے مستحق نہیں۔دوسری جانب وزیراعلی بلوچستان سرفراز بگٹی نے کہا کہ بیگناہ مزدوروں کا قتل قابل مذمت ہے، آج پھر دھرتی پر بیگناہوں کا لہو گرا، دہشت گرد بزدل اور انسانیت سے بے بہرہ ہیں۔انہوں نے کہا کہ دہشتگرد بیگناہوں کے قتل کا حساب دنیا اور آخرت دونوں میں دیں گے، دہشت گرد کب تک بلوں میں چھپیں گے، چن چن کر بیگناہ پاکستانیوں کے قتل کا حساب لیں گے، بلوچستان میں ایک بار پھر دہشتگرددوں نے غریب پاکستانی مزدوروں پروارکیا۔وزیر اعلیٰ پنجاب مریم نواز نے پنجگور میں بے گناہ مزدوروں پر فائرنگ کی شدید مذمت کرتے ہوئے سوگوار خاندانوں سے اظہار ہمدردی و تعزیت کی۔
