اسلام آباد (این این آئی)اسلام آباد پولیس نے چیئرمین پاکستان تحریک انصاف (پی ٹی آئی) بیرسٹر گوہر اور سلمان اکرم راجہ کو چھوڑ دیا۔

میڈیارپورٹ کے مطابق رہائی کے باوجود پولیس نے بیرسٹر گوہر اور سلمان اکرم راجہ کو راولپنڈی جانے سے روک دیا۔چیئرمین پی ٹی آئی نے بتایا کہ ہمیں کچھ دیر حراست میں رکھنے کے بعد چھوڑ دیا گیا۔ انہوں نے کہا کہ میرے ساتھ سلمان اکرم راجہ بھی تھے، پولیس نے ہمیں سیکٹر ایچ 13 سے گرفتار کیا۔ پولیس نے کہا کہ راولپنڈی کے بجائے واپس چلے جائیں۔بیرسٹر گوہر نے بتایا کہ سلمان اکرم راجہ اور میری بحث کے بعد پولیس نے ہمیں واپس بھیج دیا۔

واضح رہے کہ تحریک انصاف کی جانب سے پارٹی چیئرمین بیرسٹر گوہر اور سیکریٹری جنرل سلمان اکرم راجہ کو گرفتار کیے جانے کا دعویٰ کیا گیا تھا۔علاوہ ازیں راولپنڈی میں لیاقت باغ پہنچنے والے پی ٹی آئی کے متعدد کارکنوں کو بھی گرفتار کیا گیا ہے۔ادھر کمیٹی چوک پر پولیس نے پی ٹی آئی کارکنان پر شیلنگ کی اور کئی کارکنان کو گرفتار کرلیا، پی ٹی آئی کارکنوں نے بھی پولیس پر پتھرائو کیا۔