لاہور( این این آئی)پاکستان مسلم لیگ (ن)کے صدر محمد نواز شریف اوروزیراعلی پنجاب مریم نوازشریف سے جاپان کے سفیر مٹسوہیرو واڈا نے ملاقات کی جس میں باہمی دلچسپی کے امور، دو طرفہ تعلقات کے فروغ اورمختلف شعبوں میں تعاون بڑھانے پر تبادلہ خیال کیا گیا ۔
نواز شریف نے کہا کہ پاکستان اور جاپان کے مابین بہترین تعلقات کومزید وسعت دینے کے لیے پر عزم ہیں ،جاپان اقوام عالم میں اپنی محنت اور لگن سے نمایاں ہے۔ مریم نواز شریف نے کہا کہ پاکستان اور جاپان کے مابین دوطرفہ تجارتی حجم بھی بڑھانے کے لئے دلچسپی رکھتے ہیں ،تعلیم، صحت اور شہری سہولیات کی بہتری میں جاپان کا پنجاب حکومت سے تعاون لائق تحسین ہے،
پنجاب میں تعلیم، صحت، توانائی سمیت دیگر شعبوں میں سرمایہ کاری کا بڑا پوٹینشل موجود ہے۔ انہوںنے کہا کہ صوبے میں سرمایہ کاری کے لئے انتہائی ساز گار ماحول اور مراعات دے رہے ہیں ۔جاپانی سفیر مٹسو ہیرو واڈا نے کہا کہ پاکستان کے ساتھ تعلقات کو مزید فروغ دینے کے خواہاں ہیں۔ ملاقات میں سینٹر پرویز رشید، سینئر وزیر مریم اورنگزیب ، معاون خصوصی راشد نصر اللہ، چیف سیکرٹری ،پرنسپل سیکرٹری اور دیگر افسران بھی موجود تھے۔
