لاہور( این این آئی) جمعیت علمائے اسلام (ف) کے سینئر رہنما حافظ حمد اللہ نے کہا ہے کہ آئینی ترامیم کیا ہیںیہ نہ اپوزیشن کو پتہ ہے اور نہ اتحادی جماعتوں کوکچھ آگاہی ہے ۔
نجی ٹی وی سے گفتگو کرتے ہوئے انہوں نے کہا کہ وہ قانون سازی ہونی چاہیے جو ملک اور عوام کے مفاد میں ہو۔کابینہ ارکان سے بھی آئینی ترامیم کو چھپایا جا رہا ہے، اگر یہ آئینی ترامیم ملکی مفاد میں کی جا رہی ہیں تو انہیں چھپایا کیوں جا رہا ہے؟، یہ ترامیم عدلیہ کی آزادی کے لیے ہیں یا اس کو کنٹرول کرنے کے لیے ہیں؟
حافظ حمداللہ کا کہنا ہے کہ اگر حکومت مسودہ شیئر کرے تو اس پر ہم اپنا آئوٹ پٹ دیں گے، آپ یہ بتائیں کہ آپ کو کس نے مجبور کیا ہے،آپ کو جلدی کیا ہے؟۔انہوںنے کہاکہ ججز کی مدت ملازمت بڑھانے کے معاملے کی مخالفت کر رہے ہیں، حکومت کے ساتھ نہیں، حکومت ترامیم کا مسودہ دکھائے اور حکومت کو ہمیں بنانا ہو گا کہ وجوہات کیا ہیں،
اگر آپ عدلیہ میں اصلاحات لانا چاہتے ہیں تو ہمیں اعتراض نہیں، جب مجھے پتہ ہی نہیں ہے کہ مسودے میں ہے کیا تو میں کیا بات کروں۔انہوں نے کہاکہ جلد بازی، مجبوری اور خفیہ طریقے پر آپ یہ ترامیم کیوں لا رہے ہیںکیا ہم کوئی بھیڑ بکری ہیں۔ساری حکومت مولانا فضل الرحمن کی ہاں اور ناں پر کھڑی ہے۔
