فیصل آباد (این این آئی) قومی ٹیم کے فاسٹ بولر محمد عامر نے ٹی 20 کرکٹ میں بھارتی بولر کا ریکارڈ توڑ دیا۔تفصیلات کے مطابق فاسٹ بولر محمد عامر کیریبین ٹی 20 لیگ میں ایٹیگوا اور باربوڈا فالکنز کی نمائندگی کررہے ہیں،

وہ ٹی 20 کرکٹ میں بھارتی بولر بھونیشور کمار کا ریکارڈ توڑتے ہوئے سب سے زیادہ میڈن اوور کروانے والے دنیا کے تیسرے بولر بن گئے ہیں۔انہوں نے یہ اعزاز سی پی ایل کے 13ویں میچ میں حاصل کیا۔گزشتہ روز کھیلے گئے میچ میں محمد عامر نے 2.3 اوورز کروائے جس میں ایک میڈن اوور بھی شامل تھا، انہوں نے اپنے اسپیل میں 11 رنز دئیے۔

محمد عامر کے ٹی 20 کرکٹ میں میڈن اوورز کی تعداد 25 ہوگئی جبکہ بھارت کے بھونیشور کمار نے 24 میڈن اوورز کروائے ۔اس فہرست میں ویسٹ انڈین اسپنر سنیل نارائن 30 میڈن اوورز کے ساتھ پہلے اور بنگلا دیش کے شکیب الحسن 26 اوورز کے ساتھ دوسرے نمبر پر موجود ہیں۔واضح رہے کہ محمد عامر نے یہ اعزاز 302 اننگز میں حاصل کیا ہے۔