ممبئی(این این آئی) بالی وڈ کے سْپر اسٹار سلمان خان کی آئندہ ریلیز ہونے والی فلم ’سکندر‘ میں ان کے کردار سے متعلق اہم تفصیلات سامنے آگئیں۔بھارتی میڈیا نے ذرائع کا حوالہ دے کر بتایا کہ چونکہ سکندر کا مطلب پاور یا طاقت ہے لہٰذا سلمان خان معاشرے میں موجود ایک گٹھ جوڑ کو ختم کرنے میں اپنی پوری طاقت دکھائیں گے۔یہ ایک ایسا منظر ہوگا جو ہر کسی کے دل کو چھو لے گا اور فلمسازوں کو یقین ہے کہ کہانی دکھانے کے نئے انداز سے سینما گھروں کو رْخ کرنے والوں کو جذباتی کر دیں گے۔
فلم ’سکندر‘ کے ڈائریکٹر اے آر مروگاداس اور ساجد ناڈیاڈوالا پروڈیوسر ہیں۔ ان کی سلمان خان کے ساتھ پچھلی تمام فلموں کے برعکس یہ فلم دیکھنے والوں کو ایک مضبوط سماجی پیغام دے گی۔سْپر اسٹار کو ماضی کی فلموں میں غصے سے بھرپور دکھایا گیا اور اس بار بھی وہ ظلم کے خلاف لڑ کر مداحوں کے دل جیت لیں گے۔اے آر مروگاداس اور ساجد ناڈیاڈوالا بالی وڈ اداکار کو ’اینگری ینگ مین‘ کے طور پر دوبارہ متعارف کروائیں گے جو لوگوں اور ان کے حقوق کیلیے لڑیں گے۔فلم کی ریلیز عید 2025 کے موقع پر متوقع ہے۔
