جدہ(این این آئی)سعودی عرب کے مختلف علاقوں میں جولائی اور اگست کے دوران مختلف علاقوں میں درجہ حرارت میں اضافہ اور معمول سے زیادہ بارش کا امکان ہے ۔ عرب ٹی وی کے مطابق موسمیات کے قومی مرکز کی جانب سے جون سے اگست تک مملکت کے مختلف علاقوں کے موسمی حالات کی رپورٹ جاری کی گئی ہے۔
رپورٹ کے مطابق موسم گرما میں مملکت کے بیشتر علاقوں میں اوسط درجہ حرارت میں 80 فیصد تک اضافے کا امکان ہے ۔ جولائی اور اگست میں الباحہ، عسیر، جازان اور نجران میں 70 فیصد تک جبکہ مکہ مکرمہ کے پہاڑی علاقوں میں معمول سے زیادہ بارش کے امکانات ظاہر کیے گئے ہیں۔رپورٹ میں بتایا گیا کہ جولائی میں حائل، القصیم، الجوف، شمالی حدود کے علاقوں، مدینہ منورہ اور تبوک میں درجہ حرارت میں 2 ڈگری اضافے جبکہ ریاض اور الشرقیہ کے علاقوں میں ڈیڑھ ڈگری اور دیگر علاقوں میں درجہ حرارت میں ایک ڈگری تک اضافے کا امکان ہے ۔
اگست میں حائل اور شمالی سرحدی علاقوں میں اوسط سے 2 ڈگری تک کی تبدیلی جبکہ ریاض، الشرقیہ، مدینہ اور تبوک میں ڈیڑھ ڈگری تک اضافے کا امکان ہے۔رپورٹ میں جولائی میں مملکت کے مختلف علاقوں میں معمول سے زیادہ بارش جبکہ اگست میں مملکت کے بیشتر علاقوں میں بارش کا امکانات 60 فیصد امکانات ظاہر کئے گئے ہیں گے۔اسی طرح مکہ مکرمہ، مدینہ منورہ اور مشرقی علاقوں میں معمول کی بارش کی توقع ہے۔
