کوہ سلیمان (این این آئی)مشرقی بلوچستان کے کوہ سلیمان رینج میں موسلادھار بارش کے بعد چمن، ژوب مغل کوٹ سیکشن پر کوہ سلیمان کے دھانہ سر رینج میں لینڈ سلائیڈنگ ہوئی ہے۔لینڈ سلائیڈنگ کی وجہ سے ژوب ڈیرہ اسماعیل خان شاہراہ دھانہ سر کے مقام پر بند ہوگئی، بلوچستان کو خیبرپختونخوا سے ملانے والی این 70 ہائی وے بھی ٹریفک کے لیے بند رہی جس کے باعث بڑی تعداد میں گاڑیاں پھنس گئیں۔
پی ڈی ایم اے حکام نے پشاور، سوات، اسلام آباد اور پنڈی سے آنے والی ٹرانسپورٹ ڈی آئی خان پر روکنے کی ہدایات کی ہے، ژوب اور قلعہ سیف اللہ جانے والی ٹرانسپورٹ کو بھی روکنے کی ہدایت کی گئی ہے۔پی ڈی ایم اے حکام کے مطابق پھنسے مسافروں کو ریسکیو و ریلیف کے لیے ٹیمیں پہنچیں ۔ضلع آواران کے مختلف علاقوں میں بھی شدید بارش ہوئی ہے، سیڈ ندی میں طغیانی کے باعث آواران کا جھاو سے رابطہ منقطع ہوگیا ہے۔
لیویز حکام کے مطابق وھلی ندی میں طغیانی کے باعث آواران تربت روڈ بھی ٹریفک کیلئے بند ہوگئی۔بلوچستان میں 5 روز سے جاری بارشوں سے اموات کی تعداد 6 ہوگئی ،25 افراد زخمی ہوئے ہیں۔دوسری جانب بٹگرام میں لرگام کے قریب ڈبل کیبن گاڑی کھائی میں جاگری، حادثے میں ڈرائیور جاں بحق اور 15 افراد زخمی ہوگئے، گاڑی میں سوار افراد سوڑگئی سے مکڑیا کنڈر جارہے تھے۔
