اسلام آباد (این این آئی)توہین عدالت کے کیس میں سینیٹر فیصل واڈا نے سپریم کورٹ سے غیر مشروط معافی مانگ لی۔توہین عدالت کیس میں سینیٹر فیصل واڈا نے سپریم کورٹ میں دوسرا جواب جمع کروا دیا جس میں انہوں نے موقف اپنایا کہ میں عدلیہ کا مکمل احترام کرتا ہوں۔

انہوں نے کہاکہ 5 جون کی عدالتی کارروائی کے بعد مذہبی اسکالرز سے ملاقات کی اور ان سے پوچھا کہ ایک سینیٹر کا کردار کیا ہونا چاہیے، مجھے رائے دی گئی کہ انصاف کے ساتھ کھڑے رہیں چاہیے یہ بات آپ کے اقربا کے خلاف ہی کیوں نہ ہو ۔فیصل واڈا کے جواب میں قرآن و احادیث کے حوالہ جات بھی دیے گئے۔انہوں نے جواب میں کہا کہ اسلامی تعلیمات کی روشنی میں صدق دل سے غیر مشروط معافی مانگتا ہوں، سپریم کورٹ سے استدعا ہے کہ توہین عدالت میں جاری کردہ شوکاز نوٹس واپس لیا جائے۔