لاہور( این این آئی)معروف گلوکار ملکو اور سارا الطاف کوپی این آئی لسٹ میں نام ہونے کی وجہ سے لندن جانے سے روک دیا گیا۔گلوکار ملکو کے مطابق ائیر پورٹ حکام نے بتایا ہے کہ میرا نام پی این آئی لسٹ میں شامل ہے ،آرٹسٹ ہمیشہ سانجھا ہوتا ہے سب کے لیے گانے گئے ہیں، پوری دنیا کے شائقین مجھے سننا چاہتے ہیں، آف لوڈ کر دیا جائے تو پوری دنیا میں کیا پیغام جائے گا،میں نے بیرون ملک جا کر پیسہ پاکستان لے کر ہی آنا تھا ،کتنے لوگوں کے گھروں کے چولہے جلنے تھے۔
حکومت سے اپیل ہے کہ میرا نام پی این آئی لسٹ سے نکالا جائے ،لندن میں شوز نہ کرنے سے مجھے پروموٹرز کو بہت نقصان ہوگا۔اظہر صدیق ایڈووکیٹ نے کہا کہ آرٹسٹ کی کوئی سرحد نہیں ہوتی ،وہ پوری دنیا میں جانا جاتا ہے۔ یہ غیر قانونی اقدام ہے، ایک مہینے سے زائد نام پی این آئی لسٹ میں نہیں ڈال سکتے۔ اگر آپ نے اپنے آرٹسٹوں کے ساتھ بھی یہ کرنا ہے تو پھر اللہ ہی حافظ ہے۔ وزیر اعظم شہباز شریف اور وزیر داخلہ محسن نقوی کچھ خیال کریں۔
