اسلام آباد (این این آئی)وفاقی دارالحکومت اسلام آباد سمیت خیبرپختونخوا کے کئی علاقوں میں زلزلے کے جھٹکے محسوس کیے گئے ہیں ،ریکٹر اسکیل پر اس کی شدت 4.7 ریکارڈ کی گئی،زلزلے کے جھٹکے محسوس ہوتے ہی علاقہ مکین کلمہ طیبہ کا ورد کرتے ہوئے گھروں سے باہر نکل آئے۔
تفصیلات کے مطابق زلزلے کے جھٹکے اسلام آباد ،راولپنڈی، پشاور، شمالی وزیرستان، لوئر دیر، ہنگو اور گرد و نواح میں بھی محسوس کیے گئے۔ مردان ، پارا چنار، نوشہرہ،ملاکنڈ، لوئردیر میں بھی زلزلے کے جھٹکے محسوس کیے گئے۔مانسہرہ اور ہزارہ ڈویژن کے دیگر علاقوں میں بھی زلزلے کے جھٹکے محسوس کیے گئے ، زلزلے کے خوف سے لوگ گھروں سے باہر نکل آئے۔
اس کے علاوہ چارسدہ، صوابی، پارا چنار اور گرد و نواح میں بھی زلزلے کے جھٹکے محسوس کیے گئے ہیں۔زلزلہ پیما مرکز کے مطابق زلزلے کی شدت 4.7 ریکارڈ ہوئی ہے جو 98 کلومیٹر کی زیرِ زمین گہرائی میں آیا ہے۔زلزلہ پیما مرکز کے مطابق زلزلے کا مرکز جنوب مشرقی افغانستان کا علاقہ تھا۔زلزلے کے جھٹکے محسوس ہوتے ہی علاقہ مکین کلمہ طیبہ کا ورد کرتے ہوئے گھروں سے باہر نکل آئے۔فوری طور پر زلزلے کے باعث کسی نقصان کی اطلاع نہیں ملی ہے۔
