لاہور( این این آئی) وفاقی حکومت کی 100روز کی کارکردگی کے اعدادوشمار جاری کر دئیے گئے ،حکومت کی کارکردگی کو ’’ ایڈ نہیں ٹریڈ‘‘ کے سلوگن کے ساتھ جاری سامنے لایا گیا ہے ۔ وفاقی حکومت کی جانب سے جاری کردہ تفصیلات کے مطابق 100روز میں مہنگائی کی شرح 38فیصد سے کم ہو کر 11.8فیصد کی سطح پر آ گئی ، پیٹرول کی قیمت میں مجموعی طور پر35روپے کمی ہوئی،

صنعتی صارفین کے لئے بجلی کی قیمت میں تاریخی10روپے69پیسے کمی کی گئی ، ڈالر کے مقابلے میں روپیہ مستحکم رہا اور یہ 307سے کم ہو کر 278روپے کی سطح پر آ گیا ، اسٹاک مارکیٹ میں تیزی کا رجحان ریکارڈ کیا گیا جو+77000پوائنٹس رہی ،ٹیکس محصولات میں 31فیصد اضافہ ریکارڈ کیا گیا جس سے حجم 6210ارب روپے سے بڑھ کر8126ارب روپے رہا۔

کارکردگی کے اعدادوشمار میں مزید بتایاگیا کہ زر مبادلہ کے ذخائر میں 5ارب ڈالر کا اضافہ جو 9.5ارب ڈالر سے بڑھ کر14.3ارب ڈالر کی سطح پر پہنچ گئے۔ ماہانہ برآمدات میں23.4فیصد اضافہ دیکھا گیا جس سے اس کا حجم 2.13ارب ڈالر سے بڑھ کر 2.60ارب ڈالر ریکارڈ کیا گیا ۔ ترسیلات زر میں54.2فیصد اضافہ دیکھا گیا جو مئی 2023کے 2.1ارب ڈالر کے مقابلے میں مئی2024میں 3.2 ارب ڈالر رہیں۔ براہ راست بیرونی سرمایہ کار میں 39.1فیصد اضافہ ہوا جو 258ملین ڈالر سے بڑھ کر 358ملین ڈالر رہی ۔

وفاقی حکومت نے رمضان پیکج کے تحت 12.5ارب روپے کے خطیر فنڈز جاری کئے گئے جبکہ کشمیر پیکج کی مد میں23ارب دئیے گئے ۔ کسانوں کے لئے 34فیصد اضافے سے قرضوں کی فراہمی کی گئی۔ مزید بتایا گیا کہ سرکاری معاہدات کے ساتھ پرائیویٹ سیکٹر میں بزنس ٹو بزنس تعاون اور سرماریہ کاری میں متحدہ عرب امارات نے 10ارب ڈالر اور اور سعودی عرب نے 5ارب ڈالر کی سرمایہ کاری کا اعلان کر کے عملی پیشرفت کی جبکہ سی پیک فیز ٹو کا آغاز کیا گیا ۔