اسلام آباد (این این آئی) ڈسٹرکٹ اینڈ سیشن عدالت دوران عدت نکاح کیس میں سابق وزیر اعظم عمران خان اور ان کی اہلیہ بشریٰ بی بی کی جانب سے سزا معطلی اور جلد سماعت کی اپیلوں پر سماعت 21 جون تک ملتوی کردی جبکہ جج افضل مجوکا نے کہا ہے کہ اگر میں زندہ رہا تو 10 دن میں فیصلہ کروں گا۔اپیلوں پر سماعت جج افضل مجوکا نے کی، بشریٰ بی بی کے وکیل خالد یوسف چوہدری، عثمان ریاض گل عدالت میں پیش ہوئے۔
دوران سماعت پی ٹی آئی وکلا نے اسلام آباد ہائی کورٹ کا گزشتہ روز کا تحریری آرڈر عدالت میں پیش کر دیا، جج نے ریمارکس دیے کہ میں نے فیصلہ پڑھ لیا ہے، 27 جون تک سزا معطلی پر فیصلہ کرنا ہے، اگلے جمعے کی تاریخ رکھ لیتے ہیں۔انہوںنے کہاکہ اگر میں زندہ رہا تو 10 دن میں فیصلہ کروں گا، میرا جیل ٹرائل ہے، کل ممکن نہیں، میں نے رات کو خود فیصلہ ڈاؤن لوڈ کیا اور پڑھ لیا۔
اس پر وکیل عثمان گل نے کہا کہ اگلے روز کیلئے سماعت رکھ لیں ورنہ ہم آج بھی میسر ہیں آج ہی ہمیں سن لیں، جج افضل مجوکا نے ریمارکس دیے کہ اگر دوسری پارٹی پیش نہ ہوئی تو میں آپ کو سن کر فیصلہ کر دوں گا، میں آرڈر لکھ رہا ہوں نوٹس سے بڑا کچھ ہوگا، اس میں تاریخ دیکھ لیں۔بعد ازاں عدالت نے فریقین کو نوٹس جاری کرتے ہوئے سماعت 21 جون تک ملتوی کردی۔عدالت نے ریمارکس دیے کہ خاور مانیکا اور ان کے وکیل کو 21 جون کو عدالت پیش ہوں، دیگر صورت میں ریکارڈ دیکھ کر فیصلہ کردیا جائے گا۔
