لاہور( این این آئی)وزیراعلی پنجاب مریم نواز کی ہدایت پر عید الاضحی کے موقع پر قیدیوں کی سزائوں میں کمی اور رہائی کی سمری تیار کر لی گئی۔قیدیوں کی سزائوں میں کمی اور رہائی سے متعلق سمری منظوری کیلئے عید سے قبل صوبائی کابینہ کے سامنے پیش کی جائے گی۔سمری منظور ہونے کی صورت میں دو تہائی سزا مکمل کرنے والے 70سال سے زائد عمر کے مرد اور 60 سال سے زائد عمر کی خواتین قیدی مستفید ہوں گی، دو تہائی سزا مکمل کرنے والی خواتین جو 5سال سے چھوٹے بچوں کے ساتھ جیل میں ہیں مستفید ہوں گی۔

قیدیوں کی سزا میں کمی اور رہائی کیلئے دو تہائی سزا مکمل ہونا اور اچھے کنڈکٹ کا مظاہرہ لازم ہے۔علاوہ ازیں سیکرٹری داخلہ نور الامین مینگل نے سینٹرل جیل کا دورہ کیا جہاں انہوں نے کچن، ہسپتال، قیدیوں کے بیرکس، انڈسٹریل اور ووکیشنل سینٹر کا معائنہ کیا۔نور الامین مینگل نے جیل میں کھانے کا معیار اور مینیو دیکھا۔ سیکرٹری داخلہ نے ہدایت کی قیدیوں کو حفظان صحت کے اصولوں کے مطابق کھانا فراہم کیا جائے۔آئی جی جیل خانہ جات میاں فاروق نذیر اور سپرٹنڈنٹ سینٹرل جیل لاہور نے سیکرٹری داخلہ کو بریفنگ دی۔