لاہور ( این این آئی) سابق صدر مملکت ڈاکٹر عارف علوی نے کہا ہے کہ عدلیہ کو خراج تحسین پیش کرتا ہوں جو قانون کے ساتھ کھڑے ہیں،ملک کو اس وقت تعمیر کی ضرورت ہے، معیشت کی بہتری کے لئے بند گلی سے نکلا اور پیچھے ہٹا جائے ،حمود الرحمن رپورٹ سے فوج سویلین سیاستدانوں کو سیکھنا چاہیے ، غداری کا مقدمہ والی باتوں سے باہر نکلیں۔ان خیالات کا اظہار انہوں نے پنجاب اسمبلی کے احاطہ میں اعظم سواتی کے ہمراہ میڈیا سے گفتگو کرتے ہوئے کیا ۔
عارف علوی نے کہا کہ فلسطین میں جو ظلم ہو رہا ہے پی ٹی آئی ان سے اظہار یکجہتی کرتی ہے، ناروے ،سپین اور آئرلینڈ کا شکریہ ادا کرنا چاہتا ہوں جنہوں نے فلسطین کو تسلیم کیا، جنوبی افریقی حکومت کا شکریہ جو عالمی عدالت میں فلسطین کا کیس لے کر گئے۔ انہوں نے کہا کہ سعودی عرب حکومت کا شکریہ ،پاکستان کو سرمایہ کاری کی ضرورت ہے امداد کی نہیں۔ انہوں نے کہا کہ چین کے ورکرز کی سکیورٹی حکومت کی ذمہ داری ہے، سی پیک کی ساری چیزوں پر عمل درآمد کرنا ہو گا ، بیرونی سرمایہ کاری سے ملکی معیشت بہتر ہوگی۔
اس وقت دبئی میں پاکستانیوں کی دس ارب ڈالر کی سرمایہ کاری جائیداد کی شکل میں ہے۔موجودہ سیاسی صورتحال میں امن ناگزیر ہے جن کا مینڈیٹ ہے اسے واپس کیا جائے تاکہ معاشی مستقبل بہتر ہو سکے، دیسی آدمی سرمایہ کاری نہیں کرے گا تو باہر سے کیسے سرمایہ کاری ہوگی، سیاسی معاملات کو حل کریں تاکہ لوگوں کو روزگار مل سکے۔ عارف علوی نے کہا کہ صحت ،تعلیم و غربت بڑھ رہی ہے اس لئے آئندہ دنوں میں اچھے فیصلے کئے جائیں۔
انہوں نے کہا کہ جب لڑائی لڑنی ہو تو ایک کے بعد ایک وجہ مل جاتی ہے، لڑائی والی کیفیت سے باہر آئیں ۔ انہوں نے ایک سوال کے جواب میں کہا کہ حمود الرحمن رپورٹ پاکستان اور عدلیہ کی رپورٹ ہے، رپورٹ سے فوج سویلین سیاستدانوں کو سیکھنا چاہیے ، غداری کا مقدمہ والی باتوں سے باہر نکلیں، ارباب اختیار سوچیں اور معاملے میں پیش رفت کریں، بند گلی سے نکلا اور پیچھے ہٹا جائے تاکہ معیشت بہتر ہوکیونکہ ملک کو اس وقت تعمیر کی ضرورت ہے۔
انہوں نے کہا کہ ہماری تین ڈیمانڈز ہیں کہ قانون کی بالادستی ہو ، بانی پی ٹی آئی کو رہا اور مینڈیٹ واپس کیاجائے، امید پر دنیا قائم ہے حق و سچائی کیلئے کوشش کرتا رہوں گا۔ انہوں نے کہا کہ جیل میں موجود شخص سے کہا جاتا ہے کہ دل بڑا کرو اور تم معافی مانگ لو۔ انہوں نے کہا کہ آئی ایم ایف ٹیکس بڑھائے گی ۔اس موقع پر اعظم سواتی نے کہا کہ ملکی معیشت میں بہتری بانی پی ٹی آئی کی رہائی سے ممکن ہے،ملک کے دکھڑے دور کرنے کا واحد حل یہ ہے کہ بانی پی ٹی آئی کے جعلی مقدمات ختم کرکے رہا کیاجائے۔ انہوں نے کہا کہ قانون کی حکمرانی سے ملک آگے بڑھے گا اور ملک کی معیشت مستحکم ہوگی۔
