اسلام آباد (این این آئی)وفاقی دارالحکومت اسلام آباد میں ویتنام کے تعینات سفیر کی اہلیہ گھر سے لاپتا ہو گئیں جبکہ وفاقی وزیر داخلہ محسن نقوی نے واقعہ کا نوٹس لیتے ہوئے وفاقی دار الحکومت کی پولیس کو جلد ان کی تلاش یقینی بنانے کی ہدایت کردی۔خاندانی ذرائع کے مطابق ویتنامی سفیر کی اہلیہ موبائل فون اور اپنا پرس گھر پر چھوڑ کر 11 بجے باہر گئی تھیں۔
ویتنام کے تعینات سفیر کی اہلیہ کے گزشتہ کئی گھنٹوں سے لاپتا رہنے کے بعد ان کے اہل خانہ نے اسلام آباد پولیس سے رابطہ کرلیا جس کے بعد سپرنٹنڈنٹ پولیس (ایس پی) سٹی دیگر اہلکاروں کے ہمراہ موقع پر پہنچ گئے۔وفاقی دار الحکومت کی پولیس نے اہل خانہ کی شکایت پر سیف سٹی کیمروں سمیت دیگر ذرائع کا استعمال کرتے ہوئے خاتون کی تلاش شروع کردی۔دوسری جانب وفاقی وزیر داخلہ محسن نقوی نے ویت نام کے سفیر کی اہلیہ کے لاپتا ہونے کے واقعہ کا نوٹس ہوئے انسپکٹر جنرل (آئی جی) اسلام آباد پولیس سے رابطہ کرتے ہوئے ان کی باحفاظت بازیابی کے لیے تمام ضروری اقدامات کی ہدایت کردی۔
محسن نقوی نے ہدایت کہ اسلام آباد پولیس جدید ٹیکنالوجی کی مدد سے سفیر کی اہلیہ کی جلد تلاش یقینی بنانے۔انہوں نے بتایا کہ وہ اس واقعہ کے بارے میں آئی جی پولیس اسلام آباد سے مسلسل رابطے میں ہیں۔پولیس کے ترجمان کی جانب سے جاری بیان میں کہا گیا کہ ویتنام کی سفیر کی اہلیہ کو تلاش کرنے کے لیے 7 ٹیمیں تشکیل دی گئی ہیں، آئی جی اسلام آباد علی ناصر رضوی نے سینئر سپرنٹنڈنٹ پولیس (ایس ایس پیز) سیف سٹی،انویسٹی گیشن اور آپریشنز سے بریفننگ لی۔آئی جی اسلام آباد علی ناصر رضوی کا حوالہ دیتے ہوئے بیان میں کہا گیا کہ آئی جی اسلام آباد نے اعلیٰ افسران سے بریفنگ کے بعد ویتنام کے سفیر سے ملاقات کی۔
ترجمان کے مطابق آئی جی علی ناصر رضوی نے کہا کہ اسلام آباد میں مقیم سفرا کی حفاظت ہماری اولین ترجیح ہے، ویتنام کی سفیر کی اہلیہ کو تلاش کرنے کے لیے 7 ٹیمیں تشکیل دی گئی ہیں۔بعد ازاں وفاقی دارالحکومت اسلام آباد کی پولیس نے پاکستان میں ویت نام کے سفیر کی اہلیہ کا پتہ لگالیا۔ پاکستان میں ویت نام کے سفیر کی بیوی لاپتہ ہوگئی تھیں۔ وفاقی وزیرداخلہ محسن نقوی کا آئی جی اسلام آباد پولیس سے رابطہ کیا تھا اور ہدایت کی تھی کہ ویت نامی سفیر کی لاپتہ بیوی کی بحفاظت بازیابی کیلئے اقدامات کیے جائیں۔پولیس نے ویت نام کی سفیر کی اہلیہ کو تلاش کرنے کیلئے 7 مختلف ٹیمیں تشکیل دی تھیں تاہم اب اسلام آباد پولیس نے ویت نام کے سفیر کی اہلیہ کاپتہ لگا لیا۔ پولیس کے مطابق ویت نام کے سفیر کی اہلیہ اسپورٹس کلب ایف نائن پارک میں موجود تھیں جنہیں ان کے شوہر کے ہمراہ گھر بھیجا گیا۔
