لاہور ( این این آئی) وزیراعلیٰ پنجاب مریم نواز شریف نے کہا ہے کہ 13 کروڑ عوام کو جوابدہ ہوں، پولیس کرائم کنٹرول کرے،پنجاب میں کسی جگہ پر بھی نو گو ایریا برداشت نہیں،پولیس کے امور میں سیاسی مداخلت ختم کرا دی ہے ۔وزیراعلیٰ پنجاب مریم نواز کی زیر صدارت خصوصی اجلاس ہوا جس میں صوبے بھر میں امن و امان کی صورتحال کا جائزہ لیا گیا،
آئی جی پنجاب نے امن و امان کی مجموعی صورتحال اور پولیس کی کارکردگی کے بارے میں بریفنگ دی۔اس موقع پر مریم نواز کا کہنا تھا کہ 13 کروڑ عوام کو جوابدہ ہوں، پولیس کرائم کنٹرول کرے، حقائق سے آنکھیں بند نہیں کی جا سکتی، پنجاب میں کسی جگہ پر بھی نو گو ایریا برداشت نہیں، صوبے بھر میں کرائم ریٹ کو ہر صورت نیچے لانا ہوگا، جرائم زیادہ ہو تو عوام حکومت کی ریفارمز اور ڈویلپمنٹ بھول جاتی ہے۔
انہوں نے کہا کہ پولیس قربانی بھی دے رہی ہے مگر کالی بھیڑیں بھی موجود ہیں، پولیس کے ساتھ ہوں، فورس کے پیچھے کھڑی ہوں، یونیفارم پہن کر اظہار یکجہتی کیا، پولیس کو پورے وسائل مہیا کر رہے ہیں تاکہ کارکردگی میں کمی نہ آئے۔وزیراعلی پنجاب کا کہنا تھا کہ کرپشن کے خاتمے کیلئے پولیس میں کارکردگی کے تجزیے اور جانچ کا نظام لا رہے ہیں، بین الصوبائی سمگلنگ روکنے کیلئے 14 خصوصی چیک پوسٹ بنائی جا رہی ہیں، گاڑیاں، آلات، اسلحہ، ٹریننگ اور پولیس کی ہر ڈیمانڈ پوری کر رہے ہیں۔
انہوں نے کہا کہ چیک پوسٹ پر کھڑے ہر پولیس اہلکار کی حفاظت کو یقینی بنانا ذمہ داری ہے، ڈی جی خان ماڈل پر صوبے بھر میں بجلی چوری کے سدباب کے لئے موثر کارروائی کی جائے، بجلی چوری ختم ہوگی تو لوڈشیڈنگ بھی صفر ہو جائیگی۔مریم نواز کا کہنا تھا کہ 10افراد کو ہجوم سے بچانے اور بحفاظت نکالنے پر آئی جی، آر پی اوسرگودھا اور ڈی پی او کو سراہتی ہوں، لاہور میں ڈکیتی کے واقعات میں 50فیصد سے زائد کمی خوش آئند ہے، تنخواہ لیکر جانے والے مزدوروں کا لٹ جانا افسوسناک ہی نہیں، شرمناک بھی ہے۔
انہوں نے کہا کہ آر پی او شیخوپورہ کو ڈکیتی کے واقعات پر قابو پانے کیلئے ڈیڈ لائن دے دی ہے، ڈرگز کے سدباب کے لئے مستقل بنیادوں پرایکشن جاری رکھا جائے، ہوائی فائرنگ کے واقعات کو روکنے کے لئے پولیس موثر اقدامات کرے۔ان کا کہنا تھا کہ ٹریفک وارڈن کی موجودگی میں روڈ بلاک ہونا انتہائی افسوسناک ہے، روڈ پر موٹر بائیک سواروں سے لین کی پابندی کرائی جائے، پولیس کے امور میں سیاسی مداخلت ختم کرا دی، اب پولیس پرفارم کرے، ڈی پی او حضرات اپنے ڈسٹرکٹ کو کرپٹ اہلکاروں اور جرائم پیشہ افراد سے پاک کریں۔
اجلاس کے دوران پنجاب کی جیلوں میں بیگر بیرک کے قیام کی تجویز پر بھی اتفاق کیا گیا۔سینئر صوبائی وزیر مریم اورنگزیب، سینیٹر پرویز رشید، چیف سیکرٹری زاہد اختر زمان، انسپکٹر جنرل پولیس ڈاکٹر عثمان انور، ایڈیشنل انسپکٹر جنرل سپیشل برانچ، ڈی آئی جی آپریشنز، سی سی پی او اور دیگر حکام نے اجلاس میں شرکت کی، تمام آر پی اوز، سی پی اوز، ڈی پی اوز ویڈیو لنک کے ذریعے اجلاس میں شریک ہوئے۔ دوسری جانب وزیراعلیٰ پنجاب مریم نواز نے کہا ہے کہ والدین کی محبت کو سال کے 365 دن خراج تحسین پیش کیا جانا چاہیے۔
وزیراعلیٰ مریم نواز نے ’’والدین کے عالمی دن‘‘ پر پیغام جاری کرتے ہوئے کہا کہ آج والدین کی بے لوث محبت اور قربانیوں کو خراج تحسین پیش کرنے کا دن ہے، والدین کی محبت کو سال کے 365 دن خراج تحسین پیش کیا جانا چاہیے، بیٹی اور ماں کی حیثیت سے والدین کے پیار و محبت اور رہنمائی کی ضرورت کا بخوبی احساس ہے۔مریم نواز نے کہا کہ ذمہ دار شہری بنانے کے لیے والدین غیر مشروط محبت، پیار اور دیکھ بھال کے ساتھ پرورش کرتے ہیں، میں تمام والدین کی انتھک کوششوں اور قربانیوں پر سلام پیش کرتی ہوں اور شکریہ ادا کرتی ہوں۔انہوں نے کہا کہ والدین کا اپنے بچوں کی بہتر زندگی کے لیے غیر متزلزل عزم خوشحال معاشرے کی بنیاد ہے، والدین اللہ کریم کا سب سے قیمتی ترین انعام ہیں، اپنے والدین کی قدر اور احترام کریں۔وزیراعلی پنجاب کا مزید کہنا تھا کہ قران و سنت میں والدین کے درجات اورعزت و تکریم بیان کی گئی ہے، بڑھاپے میں والدین کی خصوصی دیکھ بھال اور اف تک نہ کہنے کی تلقین کی گئی ہے۔
