کراچی(این این آئی)کراچی پورٹ پر ملکی تاریخ کے سب سے بڑے کارگو جہاز کی آمد کے بعد، یورپی شپنگ کمپنی کی جانب سے کراچی پورٹ پر 2 ارب ڈالرز کی سرمایہ کاری میں دلچسپی ظاہر کی گئی ہے۔وفاقی وزیر برائے بحری امور قیصر احمد شیخ نے کہا کہ پاکستان میں اتنا بڑا جہاز آنا میری ٹائم سیکٹر کے لیے خوش آئند ہے، کمپنی میری ٹائم لاجسٹک اور انفرااسٹرکچر میں سرمایہ کاری کرے گی،
اکتوبر تک مفاہمت کی یادداشت پر دستخط کی امید ہے۔انھوں نے کہا کہ کمپنی شپ بریکنگ کا بڑا پروجیکٹ بھی گڈانی لائے گی، کمپنی پاکستان میں 750 جہازوں کی ریسائیکلنگ کا ارادہ رکھتی ہے۔قیصر شیخ نے کہا کہ کمپنی نے نوجوانوں کو جدید تربیت دینے کا بھی فیصلہ کیا ہے، کراچی پورٹ کا پوٹینشل بہت زیادہ ہے لیکن آمدنی صرف 2 ارب ہے۔وفاقی وزیر نے کہاکہ رواں سال چیئرمین کے پی ٹی کو آمدنی 10 ارب کرنے کا ٹارگٹ دیا ہے، میری ٹائم ڈسٹرکٹ کا منصوبہ ایس آئی ایف سی میں جمع کرایا ہے۔
