لاہور ( این این آئی) پنجاب حکومت کی جانب سے خصوصی عدالتوں میں ججز تقرری سے متعلق نوٹیفکیشن لاہور ہائیکورٹ میں جمع کرا دیا گیا جبکہ عدالت نے وفاقی حکومت کو ججز کی تعیناتی کے لیے 15 روز کی مہلت دے دی ۔ لاہور ہائی کورٹ کے چیف جسٹس ملک شہزاد احمد خان نے پنجاب کی خصوصی عدالتوں میں ججز کی تعیناتی سے متعلق کیس کی سماعت کی۔ایڈوکیٹ جنرل پنجاب نے ججز کی تعیناتی کے نوٹی فکیشن عدالت میں پیش کر دیئے ۔
نوٹیفکیشن کے مطابق جج خالد ارشد کو انسداد دہشتگردی عدالت لاہور ون، جج عمران حیدر کو انسداد دہشت گردی عدالت ٹو لاہور میں تعینات کر دیا گیا جبکہ جج محمد عباس کو انسداد دہشتگردی عدالت سرگودھا میں تعینات کیا گیا ہے۔جج محمد نعیم سلیم کو انسداد دہشتگردی عدالت گوجرانوالہ، جج رانا شاہد ضمیر کو انسداد دہشت گردی عدالت فیصل آباد جبکہ جج ضیا اللہ خان کو انسداد دہشتگردی عدالت ساہیوال میں تعینات کر دیا گیا۔
نوٹیفکیشن کے مطابق ڈسٹرکٹ اینڈ سیشن جج محمد بخت فخر کو پنجاب ریونیو اتھارٹی کے ایپلٹ ٹریبونل کا چیئر پرسن تعینات کر دیا گیا جبکہ ڈسٹرکٹ اینڈ سیشن جج محمد علی کو لاہور صارف عدالت کا پریزائیڈنگ افسر تعینات کیا گیا ہے۔ڈسٹرکٹ اینڈ سیشن جج محمد زاہد غزنوی کو اینٹی کرپشن عدالت فیصل آباد کا سپیشل جج تعینات کر دیا گیا جبکہ ڈسٹرکٹ اینڈ سیشن جج خالد اسحاق اینٹی کرپشن عدالت بہاولپور کے سپیشل جج ہونگے۔
نوٹیفکیشن کے مطابق ڈسٹرکٹ اینڈ سیشن جج صفدر بھٹی کو اینٹی کرپشن عدالت لاہور کا سینئر سپیشل جج تعینات کیا گیا ہے جبکہ ڈسٹرکٹ اینڈ سیشن جج ارشد حسین بھٹہ کو اینٹی کرپشن عدالت لاہور کا سپیشل جج تعینات کر دیا گیا۔ ایڈووکیٹ جنرل پنجاب خالد اسحق کا کہنا تھا کہ حکومت پنجاب نے پنجاب کی خصوصی عدالتوں میں ججز تعینات کرکے نوٹی فکیشن جاری کر دیئے ۔چیف جسٹس لاہور ہائیکورٹ نے ایڈووکیٹ جنرل پنجاب کے مثبت کردار کی تعریف کی، ان کا کہنا تھا کہ ہمارے لیے سب قابل احترام ہیں، آپ نے اچھا رویہ دکھایا ہے۔
ایڈووکیٹ جنرل پنجاب نے بتایا کہ پنجاب کی تمام انسداد دہشت گردی کی خصوصی عدالتوں میں ججز کا تقرر ہو گیا ہے، مزید بتایا کہ 2اینٹی کرپشن، اور ایک، ایک جج کی تقرری سروس ٹربیونل اور کنزیومر کورٹ میں کی گئی ہے۔ایڈووکیٹ جنرل پنجاب خالد اسحق کا کہنا تھا کہ اگر کسی جگہ پر تعیناتی ہونی ہے وہ بھی جلد از جلد مکمل کر لی جائے گی۔دوران سماعت وفاقی حکومت نے ججز کی تعیناتی کے لیے مزید مہلت مانگ لی، وکیل وفاقی حکومت کا کہنا تھا کہ وفاقی کابینہ کے اجلاس میں ججز کی تعیناتی کی منظوری لی جائے گی۔چیف جسٹس لاہور ہائی کورٹ نے ریمارکس دیئے کہ اب پنجاب حکومت نے ججز کہ تعیناتی کر دی ہے تو وفاقی حکومت نے مزید وقت مانگ لیا ہے، مزید کہنا تھا کہ کابینہ سے سرکولیشن کے ذریعے بھی ججز کی تقرری ہو سکتی ہے۔لاہور ہائیکورٹ نے وفاقی حکومت کو ججز کی تعیناتی کے لیے 15روز کی مہلت دے دی اور کارروائی ملتوی کر دی۔
