اسلام آباد (این این آئی)وفاقی وزیرِ پیٹرولیم مصدق ملک نے کہا ہے کہ ایران سے ترکیہ اور عراق کی طرح بغیر پابندیوں والی گیس خریدنا چاہتے ہیں، ایران سے پابندیوں کا مسئلہ حل کرنے کے لیے کوشش کر رہے ہیں۔وفاقی وزیرِ پیٹرولیم مصدق ملک نے پاکستان انرجی سمپوزیم سے خطاب کرتے ہوئے کہا کہ حکومت کی ترجیحات میں توانائی کی مناسب قیمت پر بلا تعطل فراہمی ہے، حکومت توانائی کی فراہمی بڑھانے کی کوشش کر رہی ہے،

پاکستان کو موسمیاتی تبدیلیوں سے بہت زیادہ مشکلات کا سامنا ہے، ہمیں موسمیاتی تبدیلیوں کو روکنے کے لیے کام کرنا ہے۔انہوں نے کہاکہ پاکستان سالانہ 18 ارب ڈالرز سے زائد توانائی کی درآمدات میں لگا رہا ہے، ہم ملک میں تیل و گیس کی تلاش کا کام تیز کر رہے ہیں، غیر ملکی کمپنیوں کو ملک میں سرمایہ کاری کے لیے خوش آمدید کہتے ہیں۔وفاقی وزیرِ پیٹرولیم مصدق ملک نے کہا کہ تیل و گیس کی تلاش میں سرمایہ کاری کو انتہائی آسان بنا دیا گیا ہے، تیل و گیس کی تلاش کے لیے معلومات اور اجازت ناموں کو ڈیجیٹلائز کر دیا گیا ہے۔

انہوں نے بتایا کہ افغانستان کی صورتِ حال کے باعث پائپ لائن میں تاخیر ہوئی، وسطی ایشیا کی گیس گوادر میں ایل این جی میں منتقل کر کے دنیا بھر میں فروخت کی جا سکتی ہے۔وفاقی وزیرِ پیٹرولیم مصدق ملک نے کہا کہ پاکستان میں گرمیوں میں بجلی کی طلب 35 ہزار میگا واٹ تک ہوتی ہے، موسمِ سرما میں بجلی کی طلب کم ہو کر 10 ہزار میگا واٹ ہو جاتی ہے۔انہوںنے کہاکہ بجلی کے ٹیرف میں کمی کے لیے مختلف تجاویز پر کام کیا جا رہا ہے، ایفیشنٹ پاور پلانٹس کو مقامی گیس کی فراہمی سے بجلی کی لاگت 12 روپے فی یونٹ تک آ جائے گی۔

وفاقی وزیرِ پیٹرولیم مصدق ملک نے کہا کہ اگر ایفیشنٹ پاور پلانٹس کو ایل این جی پر چلائیں تو بجلی کا یونٹ 24 روپے کا پڑتا ہے۔ انہوں نے کہا کہ گیس کے شعبے میں چوری و نقصانات کافی زیادہ ہیں، سوئی سدرن میں بلوچستان کے حالات کے باعث گیس نقصانات بڑھے ہیں، شہری علاقوں میں گیس کی چوری روکنے کے لیے جدید نظام لایا جا رہا ہے۔وفاقی وزیرِ پیٹرولیم مصدق ملک نے کہا کہ شہری علاقوں میں گیس نیٹ ورک کی ٹیکنالوجی کی مدد سے مکمل نگرانی کی جائے گی۔انہوں نے کہاکہ ہمارے پاس قابلِ تجدید توانائی کے وسیع وسائل ہیں، ان سے فائدہ اٹھانا چاہیے، شمسی توانائی کی قیمت میں بہت کمی ہوئی ہے اس سے بھی فائدہ اٹھانا چاہیے۔