لاہور( این این آئی)صوبائی وزیر خوراک بلال یاسین کی ہدایت پر محکمہ خوراک میں احتساب کا عمل تیز کر دیا گیا ،سیکرٹری خوراک پنجاب نے کرپشن، نااہلی اور فرائض میں سنگین غفلت پر 20 افسران معطل کردئیے۔ نوٹیفکیشن کے مطابق معطل ہونے والوں میں شیخورپورہ، فیصل آباد، جھنگ، سرگودھا، خوشاب، بھکر، بہاولنگر، راولپنڈی اور گوجرخان کے افسران شامل ہیں۔
نوٹیفکیشن کے مطابق شیخوپورہ، فیصل آباد، جھنگ اور گوجرخان سے 6 اسسٹنٹ فوڈ کنٹرولرز معطل کئے گئے ،فیصل آباد، جھنگ اور بہاولنگر میں 7 فوڈ گرین انسپکٹرز کے خلاف کارروائی کی گئی ۔سرگودھا، خوشاب اور بھکر سے 3 اسسٹنٹ فوڈ کنٹرولرز، 3 فوڈ گرین انسپکٹرز اور 1 جونیئر کلرک کومعطل کیا گیا متعلقہ افسران مکمل کلیئرنس تک اپنے علاقے میں موجود گندم کے سٹاک کے ذمہ دار ہوں گے۔
وزیر خوراک بلال یاسین کے مطابق متعلقہ افسران نے فلور ملوں پر غیر معیاری گندم کی موجودگی پر ایکشن نہیں لیا، افسران کے خلاف کرپشن، نااہلی اور فرائض کی انجام دہی میں غفلت پر کارروائی کی گئی، محکمے میں نااہل، کرپٹ اور فرائض میں کوتاہی برتنے والوں کی کوئی جگہ نہیں۔ صوبائی وزیر خوراک بلال یاسین نے کہا کہ حکومت عوامی ریلیف میں حائل کوئی رکاوٹ برداشت نہیں کرے گی ،پنجاب بھر کی مارکیٹس میں معیاری اور سستے آٹے کی فراہمی یقینی بنانے کیلئے مصروف عمل ہیں۔
