اسلام آباد (این این آئی)وزیراعظم محمد شہبازشریف نے کہا ہے کہ مجھے یقین ہے ہاکی کاکھیل دوبارہ عروج حاصل کرے گا،ہاکی کے کھیل کی بہتری کے لئے کوئی کسرنہیں چھوڑیں گے، کھلاڑیوں کو محکموں میں دوبارہ شامل کرنے کی پالیسی پر ایک ہفتے میں عملدرآمد کیاجائے،پاکستان ہاکی ٹیم کے کھلاڑی اذلان شاہ ہاکی ٹورنامنٹ میں ہارکر بھی جیت گئے ہیں، میری خواہش ہے کھلاڑیوں کی کارکردگی ایسی کہ ان میں ماضی کے ہیروز دکھائی دیں۔

وہ جمعرات کو وزیراعظم ہائوس میں اذلان شاہ ہاکی ٹورنامنٹ کا فائنل کھیلنے والی قومی ہاکی ٹیم کے اعزازمیں تقریب سے خطاب کررہے تھے ۔تقریب میں وفاقی وزیر اطلاعات و نشریات عطااللہ تارڑ،وفاقی وزیر منصوبہ بندی احسن اقبال، وزیراعظم یوتھ پروگرام کے چیئرمین رانا مشہود احمد خان، وزیرمملکت برائے انفارمیشن ٹیکنالوجی شزہ فاطمہ ،پاکستان ہاکی فیڈریشن کے عہدیداراوں اور کھلاڑیوں نے بھی شرکت کی۔ وزیراعظم نے کہاکہ آپ کے سامنے مہمان خصوصی بن کر نہیں بلکہ آپ نے پاکستان کے نام کو ہاکی میدان میں بلند کرنے کے لئے دنیاکے سامنے جو شاندار کارکردگی پیش کی ہے اسے سراہنے کے لئے موجود ہوں۔

انہوں نے کہاکہ تقریب کے مہمان خصوصی قومی ہاکی ٹیم کے کپتان ، کھلاڑی ، فیڈریشن کے عہدیدار اور اولمپکس گیمزمیں حصہ لینے والے دوسرے کھلاڑی ہیں۔ وزیراعظم نے کہا کہ سب کو دل کی گہرائیوں سے مبارکباد پیش کرتے ہیں،پوری قوم اس بات کی گواہی دے رہی ہے کہ اذلان شاہ ہاکی ٹورنامنٹ کے فائنل میں ہماری ہاکی ٹیم ہاری نہیں جیتی ہے۔ انہوںنے کہاکہ پچھلے ڈیڑھ دو عشروں میں پاکستان میں ہاکی کا کھیل انحطاط کا شکار رہا۔ انہوںنے کہاکہ سمجھ نہیں آتی تھی کہ کب وہ دن آئے گا جب پاکستان کے عوام آپ کی کارکردگی دیکھ کر صلاح الدین ، اختر رسول اور دوسرے مایہ نازکھلاڑیوں کو یاد کریں گے،ان عظیم کھلاڑیوں اور ہیروز نے پوری دنیا میں پاکستان کا پرچم بلند کیا۔

انہوں نے کہاکہ آج کسی حیل و حجت کے بغیر یہ بات کرسکتاہوں کہ ہمارے وہ ماضی کے عظیم دن واپس آ گئے ہیں۔ وزیراعظم نے کہاکہ مجھے یقین ہے کہ ہاکی کاکھیل دوبارہ عروج حاصل کریگا،میری خواہش ہے کہ ہاکی کے کھلاڑیوں کی کارکردگی ایسی ہو کہ ماضی کے ہیروز آپ میں دکھائی دیں۔انہوںنے کہاکہ ہاکی ٹیم کی مربوط کاوش آج رنگ لائی ہے۔ وزیراعظم نے کہاکہ ہار جیت کھیلا کا حصہ ہے تاہم جس طریقے سے آپ نے مقابلہ کیا ہے وہ مستقبل میں جیت کی نوید ہے۔ انہوں نے کہاکہ شاندار کارکردگی پر ہاکی ٹیم کے کھلاڑیوں ، ان کے والدین ، کوچز اور منتظمین کو مبارکباد اور سلام پیش کرتاہوں۔

انہوں نے کہاکہ ہاکی کے فروغ اور بحالی کیلئے وفاقی حکومت بھرپور تعاون کرے گی۔انہوں نے کہاکہ ہاکی کے کھیل کی بہتری کے لئے کوئی کسر نہیں چھوڑیں گے،اس سلسلہ میں فیڈریشن اور دیگر فریقین کے ساتھ مل کر اقدامات کئے جائیں گے۔ وزیراعظم نے کہا کہ پی ڈی ایم کی حکومت کی مشترکہ کاوشوں پاکستان دیوالیہ ہونے سے بچ گیا۔ انہوںنے کہاکہ گزشتہ دور حکومت میں 16 مہینے ہمارے لئے انتہائی مشکل تھے۔ ان مشکل حالات میں ہم نے ملکی معیشت کو بہتری کی طرف گامزن کیا، اس وقت ہم نے کرکٹ، ہاکی اور دیگر کھیلوں کے کھلاڑیوں کو محکموں میں شامل کرنے کی پالیسی کا اعلان کیا تھا،اب اس کو یقینی بنایا جائیگاکہ ہمارے ممتازکھلاڑیوں کو اداروں میں ملازمت کے مواقع فراہم کئے جائیں تاکہ وہ کھیل کے میدان میں پوری طرح اپنی صلاحیتوں کا لوہا منوا سکیں اور انہیں وسائل کی کمی کاسامنا نہ ہو۔

وزیراعظم نے وفاقی وزیر بین الصوبائی رابطہ اور چیئرمین وزیراعظم یوتھ پروگرام کو ہدایت کی کہ ایک ہفتے کے اندر اس پالیسی کااجرااور عملدرآمد یقینی بنایا جائے۔ اس موقع پر پاکستان ہاکی ٹیم کیسابق کپتان شہبازاحمد نے کہا کہ اس تقریب میں ہمیں شرکت کرکے بہت خوشی ہوئی ہے۔وزیراعظم نیکھلاڑیوں کو حوصلہ افزائی کی ہے، انشااللہ یہ پاکستان کے لئے میڈلز جیت کر لائیں گے۔سابق اولمپین سمیع اللہ نے کہاکہ قومی ہاکی ٹیم کے کھلاڑیوں کی وجہ سے ہمیں اس تقریب میں شرکت کا موقع مل رہا ہے۔انہوںنے کہاکہ ہماری دعا ہے کہ پاکستان میں ہاکی فروغ پائے،ہاکی کے کھلاڑیوں کی حوصلہ افزائی اسی طرح ہونی چاہیے اور کھلاڑیوں کو بھی چاہیے کہ وہ اپنی کارکردگی سے ثابت کریں کہ وہ پاکستان کے لئے جیت کے میڈلز لاتے رہیں۔

سابق اولمپین صلاح الدین نے کہا کہ ہاکی ٹیم کے کھلاڑیوں نے بہت محنت کی ہے،وزیراعظم کھیلوں میں بھرپور دلچسپی لیتے ہیں اور کھیل اور کھلاڑیوں سے محبت کرتے ہیں۔ وزیراعظم نے اس چیزکو محسوس کیا کہ ان کھلاڑیوں کو حوصلہ افزائی کی ضرورت ہے۔ ہاکی ہمارا قومی کھیل ہے۔ کھلاڑی ملک اور قوم کے لئے کھیلتے ہیں انہیں ذرا سی بھی توجہ مل جائے تو یہ اپنے ملک کے لئے جان کی بازی لگا دیتے ہیں۔ پاکستان ہاکی ٹیم کے سنٹر فارورڈ عبدالرحمان نے کہا کہ انہوں نے پہلی مرتبہ بین الاقوامی سطح پر مقابلیمیں حصہ لیا،اذلان شاہ ہاکی ٹورنامنٹ کے فائنل میں اپنی شکست کا جاپان سے جلد بدلہ لیں گے۔ انہوںنے کہاکہ پاکستان ہاکی ٹیم کے کپتان عماد بٹ نے کہاکہ ہماری ٹیم نے اپنی پرفارمنس میں کوئی کمی نہیں چھوڑی ، انشا اللہ آگے چل کے ملک کے لئے کامیابیاں حاصل کریں گے۔اس موقع پر وزیراعظم نے پاکستان ہاکی ٹیم کے کھلاڑیوں، ایتھلیٹ ارشد ندیم اور پیرس اولمپکس کیلئے کوالیفائی کرنے والے رایفل شوٹنگ ٹیم میں چیک تقسیم کئے۔