کراچی (این این آئی)ٹی ٹوئنٹی ورلڈ کپ 2009 کی فاتح پاکستان ٹیم کے کپتان یونس خان نے کہا ہے کہ اب ٹی ٹوئنٹی کرکٹ میں 200 رنز کریں گے تو میچ بچانے کی پوزیشن میں ہوں گے۔ 170 والا اسکور اب نہیں چلتا۔میڈیا سے گفتگو میں یونس خان نے کہا کہ ضروی ہے کہ پاور پلے کے بعد مڈل اوورز میں بھی رنز بنانے کی رفتار 8 یا 9 رنز فی اوورز رہے تاکہ ٹیم اچھا ٹوٹل بناسکے۔

انہوں نے کہاکہ پلیئرز کو اپنا گیئر تبدیل کرنا ہوگا، بابر اعظم، فخر زمان اور رضوان کو اگلے گیئر میں جانا ہوگا۔سابق کپتان نے کہا کہ آج کل کی کرکٹ میں زیادہ رنز کیے جاسکتے ہیں، کھلاڑیوں کی ذمہ داری ہوتی ہے کہ وہ گیئر کیسے بدلیں، اگر مڈل اوور میں بھی رنز کی رفتار ٹھیک رہی تو بہتر ہوتا ہے۔یونس خان نے کہا کہ کپتان کو آٹ آف دا باکس سوچنا ہوگا، آٹ آف باکس پہلے سے پلان نہیں کیا جاسکتا۔

چیمپئن کپتان نے کہا کہ کھلاڑیوں کو اپنے کمفرٹ زون سے باہر نکلنا ہوگا، آپ کو ہر نمبر پر بیٹنگ اور ہر جگہ بولنگ کیلئے تیار رہنا چاہیے۔انہوںنے کہاکہ ہر کھلاڑی کو کپتان کی مدد کرنا چاہیے، صرف ایک بندے پر نہ چھوڑیں، سب اسکا ساتھ دیں۔یونس خان نے بتایا کہ ٹی ٹوئنٹی ورلڈکپ 2009 میں شاہد آفریدی نے جیت میں اہم کردار ادا کیا۔لیگ کرکٹ کے حوالے سے یونس خان نے کہا کہ لیگ کھیلنے کیلیے پلیئرز کو خود کو فٹ رکھنا ضروری ہے۔انہوںنے کہاکہ لیجنڈز کی لیگ میں پرانے دوستوں سے ملنا کافی اچھا لگتا ہے۔ انڈیا پاکستان کے ریٹائرڈ پلیئرز کا کھیلنا بھی ڈپلومیسی ہے۔