اسلام آباد (این این آئی)پاکستان کے 30 شہروں میں نادرا دفاتر میں ون ونڈو پاسپورٹ کائونٹر شروع کرنے کا فیصلہ کیا گیا ہے۔ذرائع کے مطابق یہ فیصلہ وزیر اعظم شہباز شریف کی زیر صدارت اجلاس میں ہوا تھا۔وزیر اعظم شہباز شریف نے اس حوالے سے کہا تھا کہ جس تحصیل یا سب تحصیل میں پاسپورٹ آفس نہیں وہاں نادرا پاسپورٹ بنائے۔شہباز شریف کی ہدایت پر باضابطہ نوٹیفکیشن جاری کر دیا گیا ۔

نوٹیفکیشن کے مطابق نادرا کے دفتر میں ہی اب پاسپورٹ کا بھی ایک کاؤنٹر موجود ہو گا، لاہور ریجن کے 12 چھوٹے شہروں میں پاسپورٹ نادرا بنائے گا۔کراچی کے 2 علاقوں میں نادرا سینٹر پر پاسپورٹ بن سکے گا، ملتان کے 6 نادرا سینٹرز پر پاسپورٹ بنوایا جا سکے گا۔نوٹیفکیشن کے مطابق سرگودھا کے 2، کے پی میں 4 اور اسلام آباد کے 2 نادرا سینٹرز بھی پاسپورٹ بنائیں گے۔

اس حوالے سے ڈی جی پاسپورٹ نے کہا کہ پاسٹورٹ کائونٹر ان تحصیلوں میں نادرا دفاتر میں شروع کیے جائیں گے جن کی آبادی زیادہ ہے۔انہوں نے کہا کہ معاشی حالات بہتر ہونے پر تحصیلوں میں پاسپورٹ آفس قائم کریں گے، نادرا دفاتر میں قائم پاسپورٹ کائونٹر محکمہ پاسپورٹ اینڈ امیگریشن کنٹرول کرے گا۔انہوںنے کہاکہ نادرا فی پاسپورٹ سرکاری فیس کے علاوہ 1 ہزار روپے وصول کرے گا، 10 جون سے ہر نادرا آفس میں پاسپورٹ جاری کرنے والی خبر میں کوئی صداقت نہیں۔