اسلام آباد (این این آئی)واٹر اینڈ پاور ڈیولپمنٹ اتھارٹی (واپڈا)نے 969 میگاواٹ کا نیلم جہلم ہائیڈرو پاور پروجیکٹ معائنے کے لیے مکمل طور پر بند کر دیا گیا ہے، جس کی مالیت 500 ارب روپے سے زائد ہے۔میڈیارپورٹ کے مطابق واپڈا نے بتایا کہ ایک ماہ قبل بڑا آپریشنل مسئلہ سامنے آنے کے بعد یہ فیصلہ کیا گیا ہے، جس کے نتیجے میں پروجیکٹ کی ہیڈریس ٹنل میں دبا ئومیں نمایاں اتار چڑھا آیا۔
بیان کے مطابق پروجیکٹ کنسلٹنٹس اور بین الاقوامی ماہرین کے ساتھ مل کر ایک جامع منصوبہ تیار کیا جائے گا تاکہ مسئلہ کا پتا لگانے کے بعد اسے ٹھیک کرنے کے کام کیا جا سکے۔ہیڈریس ٹنل کے دبا ئومیں 2 اپریل کو اچانک تبدیلی دیکھی گئی، ٹنل کی حفاظت کے لیے کنسلٹنٹس کے مشورے کے مطابق پروجیکٹ کی انتظامیہ نے 6 اپریل کو ہیڈریس ٹنل کے دبا ئومیں اتار چڑھا کی نگرانی کے لیے پلانٹ کو 530 میگاواٹ کی محدود پیداوار پر چلانا شروع کیا۔
آزاد کشمیر میں واقع یہ پلانٹ 29 اپریل تک اس کم صلاحیت پر کام کرتا رہا، اس کے بعد ٹنل کے دبا ئومیں مزید اتار چڑھا کے باعث بجلی کی پیداوار میں بتدریج کمی کی ضرورت تھی۔واپڈا نے بتایا کہ 29 اپریل کو رات 11 بجے کے قریب ہیڈریس ٹنل کے دبائو میں مزید تبدیلی دیکھی گئی، جس کے بعد پیداوار مزید کم ہو گئی، پروجیکٹ کنسلٹنٹس کے مشورے کے مطابق دبا ئومحفوظ حدود کے اندر برقرار نہیں رہ سکا۔بتایا گیاکہ لہذا ہیڈریس ٹنل اور پاور ہائوس کی حفاظت کو مدنظر رکھتے ہوئے پلانٹ کو یکم مئی کو صبح 6 بجے فزیکل معائنے کے لیے بند کر دیا گیا تاکہ دبا ئومیں کمی کا باعث بننے والے مسئلے کی نشاندہی کی جا سکے۔
واپڈا نے کہا کہ اس منصوبے میں 51.5 کلومیٹر طویل سرنگ کا نظام ایک کمزور ارضیاتی اور زلزلے کے شکار علاقے میں بنایا گیا ہے، اس کی ہیڈریس ٹنل 48 کلومیٹر لمبی ہے جبکہ ٹیلریس ٹنل 3.5 کلومیٹر لمبی ہے، تقریبا 90 فیصد منصوبہ زیر زمین ہے۔واپڈا نے بتایا کہ جولائی 2022 میں نیلم جہلم ہائیڈرو پاور پروجیکٹ ٹیلریس ٹنل میں بڑی دراڑیں پڑنے کی وجہ سے بند کر دیا گیا تھا، جس کے بعد اگست ستمبر 2023 میں ریس ٹنل میں بحالی کا کام مکمل ہونے پر ایک سال بعد اس سے بجلی کی پیداوار دوبارہ شروع کی گئی تھی جبکہ 28 مارچ کو صلاحیت کے مطابق 969 میگاواٹ بجلی کی پیداوار حاصل کی گئی۔
