لاہور( این این آ ئی ) پاکستان ریلوے کی آمدن تاریخ کی بلند ترین سطح پر پہنچ گئی۔ بتایا گیا ہے کہ مالی سال کے 9ماہ میں ریلوے نے 66 ارب روپے کی آمدن حاصل کر لی ہے اور مالی سال کے اختتام پر آمدنی 80 ارب سے زائد ہونے کے روشن امکانات ہیں۔ بتایا گیا ہے کہ ریلوے کے پاس دس روز کا ڈیزل سٹاک بھی موجود ہے جبکہ عید پر بلا تعطل ٹرین آپریشن کے لئے پندرہ لاکھ لیٹر ڈیزل خرید لیا گیا ہے ۔
سی ای او ریلوے عامر علی بلوچ نے کہا کہ سپیشل ٹرینوں کی سو فیصد بکنگ مکمل ہو چکی ہے ، ریلوے پر اعتماد پر مسافروں سے اظہار تشکر کرتے ہیں ۔ریلوے انتظامیہ نے مسافروں کی ڈیمانڈ کو پیش نظر رکھتے ہوئے عید کی سپیشل ٹرینوں میں اضافی کوچز لگانے کا فیصلہ کیا ہے ،ریلوے نے 10 اپریل کو واجب الادا تنخواہ بھی پانچ روز قبل ہی بنکوں میں بھجوا دی ہے ۔اس سے قبل مختلف شعبوں کی تنخواہیں تین ،تین ہفتے تاخیر کا شکار تھیں۔
