اسلام آباد (این این آئی)سینیٹ کی 19 نشستوں کیلئے انتخابات مکمل ہوگئے، پیپلز پارٹی نے 11، مسلم لیگ (ن) نے 6 نشستیں حاصل کرلیں۔ تفصیلات کے مطابق سینیٹ کی 19 نشستوں کیلئے انتخابات مکمل ہوگئے ہیں، پیپلز پارٹی نے 11، مسلم لیگ (ن) نے 6 نشستیں حاصل کی ہیں،جبکہ سندھ سے آزاد امیدوار فیصل واڈا بھی کامیاب ہوگئے۔اسلام آباد کی ٹیکنوکریٹک کی نشست پر وزیرخارجہ اسحاق ڈار نے کامیابی حاصل کی ہے، انہوں نے 222ووٹ لئے جبکہ ان کے مدمقابل راجا عنصر محمود نے 81ووٹ حاصل کئے۔
مجموعی طور پر 310ارکان نے ووٹ ڈالا جس میں سے 7ووٹ مسترد ہوئے،اسی طرح جنرل نشست پر پیپلز پارٹی کے رانا محمودالحسن 224ووٹ لے کر کامیاب ہو گئے، ان کے مدمقابل فرزند علی شاہ کو 79 ووٹ ملے۔ کل 310ووٹ کاسٹ کیے گئے جس میں سے 7 ووٹ مسترد ہوئے۔سندھ سے سینیٹ کی 12نشستوں پر 20امیدوار مدمقابل تھے، جن میں سے 10پیپلزپارٹی ،ایک ایم کیو ایم پاکستان اور ایک آزاد امیدوار نے حاصل کی،جنرل نشستوں پر پی پی پی کے اشرف علی جتوئی، دوست علی جیسر، کاظم علی شاہ، مسرور احسن، ندیم بھٹو، ایم کیو ایم کے عامرچشتی اور آزادامیدوار فیصل واوڈا سینیٹر منتخب ہوئے،
خواتین کی مخصونشستوں پر پیپلزپارٹی کی قر اۃلعین مری 59اور روبینہ قائم خانی 58ووٹ حاصل کرکے سینیٹر منتخب ہوئیں۔ٹیکنوکریٹس کی نشستوں پر پیپلز پارٹی کے سرمد علی 59اور بیرسٹرضمیر گھمرو 58ووٹ لے کر کامیاب ہوئے جبکہ اقلیتوں کی نشست پر پیپلز پارٹی کے پنجومل بھیل سینیٹر منتخب ہوئے۔پنجاب میں 12خالی نشستوں پر 7پر امیدوار بلامقابلہ کامیاب ہوئے تھے ، منگل کو 5نشستوں پر مقابلہ ہوا،لاہور سے ٹیکنوکریٹ کی نشست پر محمد اورنگزیب نے 128اور مصدق ملک نے 121ووٹ لے کر کامیابی حاصل کرلی۔
خواتین کی مخصوص نشستوں پر مسلم لیگ (ن)کی انوشہ رحمان اور بشری بٹ کامیاب ہوگئیں، انوشہ رحمان احمد خان نے 125، بشری انجم بٹ نے 123ووٹ حاصل کئے جبکہ سنی اتحاد کونسل کی صنم جاوید خان 102ووٹ حاصل کر سکیں اور 6ووٹ مسترد ہوئے۔پنجاب اسمبلی میں سینیٹ کی اقلیتی نشست پر مسلم لیگ(ن)کے خلیل طاہر سندھو نے 253ووٹ حاصل کرکے کامیابی حاصل کی جبکہ سنی اتحاد کونسل کے آصف عاشق 99ووٹ حاصل کر سکے اور 4ووٹ مسترد ہوئے۔ خیبرپختونخوا میں سینیٹ کی 11نشستوں پر انتخابات ملتوی کردئیے گئے ہیں۔بلوچستان اسمبلی سے تمام 11امیدوار بلامقابلہ منتخب ہوچکے ہیںجبکہ خیبرپختونخوا میں اپوزیشن کی درخواست پر الیکشن کمیشن نے کے پی میں 11نشستوں پر الیکشن ملتوی کردیئے ہیں۔
