اسلام آباد(این این آئی)وفاقی وزیرخزانہ محمد اورنگزیب اور چین کے سفیر جیانگ زائی ڈونگ کی ملاقات میں معاشی تعلقات کو مزید وسعت دینے پر اتفاق کیا گیا ہے۔منگل کووزارت خزانہ کے اعلامیہ کے مطابق چینی سفیر نے وزیر خزانہ کو عہدہ سنبھالنے پر مبارک باد دی۔اس موقع پر چینی سفیر نے کہاکہ پاک چین معاشی تعلقات کی مزید مضبوطی کیلئے پراعتماد ہوں۔
وفاقی وزیر خزانہ نے کہاکہ مختلف شعبوں میں سپورٹ کیلئے چینی قیادت کے مشکور ہیں، سیف ڈپازٹ رول اوور کرنے پر چین کے خصوصی طور پر شکر گزار ہیں۔محمد اورنگزیب نے کہاکہ رول اوور اور کمرشل قرض سے پاکستان کی معیشت میں استحکام آیا، پاکستان کی ترقی اور معاشی بحالی کے لئے سی پیک بہت اہم ہے۔اعلامیہ کے مطابق پاکستان اور چین نے صنعتی زون، زراعت، معدنیات اور قابل تجدید توانائی شعبے میں تعاون پر اتفاق کیا۔ملاقات میں پاکستان اور چین کے درمیان معاشی تعلقات کو مزید وسعت دینے پر بھی اتفاق کیا گیا۔اعلامیہ کے مطابق سی پیک کے اگلے مرحلے میں موجودہ سی پیک منصوبوں پر توجہ مرکوز ہوگی۔
