لاہور( این این آئی) وزیر اعلیٰ پنجاب مریم نواز شریف کی بروقت مداخلت سے پاکستان تحریک انصاف کی سابق رکن اسمبلی ملیکہ بخاری کو اپنی بہن کی عیادت کے لئے بیرون ملک جانے کی اجازت مل گئی ،ملیکہ بخاری نے ایکس پر ایک پوسٹ میں کہا تھا کہ انہوں نے آسٹریلیا اپنی بیمار بڑی بہن سے ملنے جانا ہے تاہم گزشتہ ایک سال سے ان کا نام نو فلائی لسٹ میں ہے،انہوں نے اپنی پوسٹ میں کہا تھا کہ ان کی بڑی بہن وینٹی لیٹر پر ہیں اور وہ زندگی کی جنگ لڑ رہی ہیں اور ان کے پاس صرف 24 گھنٹے کا وقت ہے۔

مریم نواز نے ان کی پوسٹ پر جواب دیتے ہوئے کہا تھا کہ وہ متعلقہ حکام سے بات کریں گی، امید ہے کہ آپ نے اس سلسلے میں درخواست دی ہو گی۔بعدازاں بیرون ملک جانے کی اجازت ملنے پر ملیکہ بخاری نے مریم نواز کا شکریہ ادا کیا اور کہا کہ آپ کی بروقت مداخلت کا شکریہ، مجھے اطلاع دی گئی ہے کہ میرا نام نو فلائی لسٹ سے نکال دیا گیا ہے۔ 9مئی کے واقعات کے بعد حکومت کی جانب سے کریک ڈائون کے دوران پاکستان تحریک انصاف کے دیگر کارکنان سمیت ملیکہ بخاری کو بھی گرفتار کیا گیا تھا۔ 25 مئی کو اسلام آباد پریس کلب میں پریس کانفرنس کرتے ہوئے ملیکہ بخاری نے پاکستان تحریک انصاف کو خیر باد کہہ دیا تھا۔