لاہور( این این آئی)سنی اتحاد کونسل نے پنجاب اسمبلی کے اجلاس میں مخصوص نشستوں کے حلف کے موقع پر بھرپور احتجاج کا فیصلہ کیا ہے ۔ سنی اتحاد کونسل کے رہنما رانا آفتاب احمد خان نے کہا کہ جعلی مینڈیٹ پر منتخب خواتین کو حلف اٹھانے سے روکیں گے، صدارتی الیکشن کے موقع پر کسی اجنبی کو ووٹ نہیں ڈالنے دیں گے۔
احمد خان بھچر نے کہا کہ نومنتخب خواتین قانونی طور پر اسمبلی کی ممبر نہیں، آج جمعہ کو پارلیمانی پارٹی کے اجلاس میں احتجاج کی حکمت عملی طے کی جائے گی۔اس کے علاوہ 9 مارچ کے صدارتی انتخاب کے حوالے سے سنی اتحاد کونسل نے پارلیمانی پارٹی کا اجلاس پنجاب اسمبلی میں طلب کر لیا۔پارلیمانی پارٹی کے اجلاس میں امیدوار محمود خان اچکزئی کے لئے پولنگ ایجنٹس اور دیگر معاملات کو حتمی شکل دی جائے گی۔
