کراچی(این این آئی)گزشتہ برس دوسری بار شادی کے بندھن میں بندھنے والی پاکستانی سپر اسٹار ماہرہ خان نے اپنے بیٹے اذلان خان کے نام جذباتی پیغام شیئر کر دیا۔فوٹو اینڈ ویڈیو شیئرنگ پلیٹ فارم انسٹاگرام پر اداکارہ نے کتاب کے ایک ورق کی تصویر انسٹااسٹوری پر شیئر کی جس پر خوبصورت نظم تحریر ہے،جو غالبا اداکارہ کے اپنے بیٹے کیلئے جذبات کا اظہار کر رہے ہیں۔ماہرہ خان نے اس نوٹ کے ذریعے اپنے 17سالہ بیٹے اذلان سے جذبات و احساسات کا اظہار کیا ہے کہ وہ دیکھتے ہی دیکھتے بڑا ہوگیا۔
نظم کے مطابق بیٹا، ایک وقت تھا جب مجھے تمہیں اپنی گود میں اٹھانے کیلئے نیچے جھکنا پڑتا تھا، تم اپنے چھوٹے بازو اور ننھی انگلیاں میری جانب بڑھاتے تھے لیکن اب مجھے تمہیں دیکھنے کے لیے بس اپنا سر گھمانا پڑتا ہے،میں نہیں جانتی کہ یہ کب ہوگیا۔نظم میں لکھا ہے کہ تم کب چھوٹی چھوٹی گاڑیوں سے کھیلتے کھیلتے اتنے بڑے ہوگئے کہ مجھے گھر کے سودے سلف کی خریداری میں مدد کرنے لگے،تم مجھے اس وقت تک ہنساتے رہتے ہو جب تک میری آنکھوں سے آنسو جاری نہ ہو جائیں، میں تم سے اپنی زندگی کے حوالے سے بہت کچھ سیکھا ہے، تم اور میں ایک ساتھ پروان چڑھے ہیں، زندگی کے اس سفر میں خوبصورت ساتھی بننے کا شکریہ۔
