اسلام آباد(این این آئی)مسلم لیگ (ن) کے قائد نواز شریف اور شہباز شریف نے بانی پی ٹی آئی کی جانب سے آئی ایم ایف کو لکھے گئے خط کو ملک دشمنی قرار دے دیا۔جمعرات کوپارلیمنٹ ہائوس آمد پر میڈیا سے گفتگو کرتے ہوئے نواز شریف نے کہاکہ آئی ایم ایف کو خط لکھنا ملک دشمنی کے مترادف ہے،ایسے خط وہی لکھ سکتے ہیں یہ ان کا وتیرہ ہے۔
نواز شریف نے کہاکہ کوئی سیاسی جماعت ایسے خط نہیں لکھ سکتی، اس خط سے آپ خود ہی نتیجہ اخذ کر لیں۔اس حوالے سے بات کرتے ہوئے مسلم لیگ (ن)کے صدر شہباز شریف نے کہا کہ بانی پی ٹی آئی نے آئی ایم ایف کو لکھا ہے کہ پاکستان کے ساتھ نیا پروگرام نہ کیا جائے۔شہباز شریف نے کہاکہ پی ٹی آئی کا خط،سائفر کے بعد ایک اور ملک دشمنی کا ثبوت ہے،کسی کو کوئی شک نہیں رہنا چاہیے کہ یہ چاہتے ہیں پاکستان مکمل طور پر تباہ ہو جائے۔
انہوں نے کہاکہ میں سمجھتا ہوں یہ ایک انتہائی افسوسناک اقدام ہے،بانی پی ٹی آئی کے اس اقدام کی جتنی مذمت کی جائے کم ہے، کوئی پاکستانی کیسے بھی سیاسی اختلافات ہوں ملک کے لیے بددعا نہیں کرتا۔مسلم لیگ (ن)کے رہنما عطا تارڑ نے کہاکہ مخالفین نے آئی ایم ایف کو خط لکھ دیا ہے، خط میں کاش لکھ دیتے کہ میں قیدی ہوں اور کرپشن کیسز میں اندر ہوں،پہلے امریکی سازش اور اب امریکا سے مدد،کیا آئی ایف ایم کو خط لکھ کر ملک میں بحران پیدا کرنا ہے؟ یہ اقدام ملک کے خلاف اور ذاتی انا کی تسکین ہے۔
