لاہور (این این آئی)پاکستان سپر لیگ کی فرنچائز پشاور زلمی کے کپتان بابر اعظم نے گزشتہ روز کی شاندار پرفارمنس اور ناقابل شکست سنچری کی وجہ بتا تے ہوئے کہاہے کہ مجھے بہت خوشی ہے کہ میری والدہ پہلی بار میرا میچ دیکھنے کے لیے گرائونڈ میں آئیں، ورنہ وہ عام طور سے ٹی وی پر ہی مجھے کھیلتا ہوا دیکھتی تھیں۔تفصیلات کے مطابق گزشتہ قومی ٹیم کے سابق کپتان بابر اعظم اسلام آباد یونائیٹڈ کے خلاف شاندار پرفارمنس پیش کرتے ہوئے 111 رن بنا کر ناٹ آئوٹ رہے تھے۔

میچ کے اختتام پر گفتگو کرتے ہوئے انہوں نے اپنی اس بہترین پرفارمنس اور ناقابل شکست سنچری کا سہرا اپنی والدہ کے سر سجا دیا۔کھلاڑی نے کہا کہ مجھے بہت خوشی ہے کہ میری والدہ پہلی بار میرا میچ دیکھنے کے لیے گرائونڈ میں آئی ہیں، ورنہ وہ عام طور سے ٹی وی پر ہی مجھے کھیلتا ہوا دیکھتی تھیں۔بابر اعظم نے کہا کہ میری والدہ میرے لیے خوش قسمتی کی علامت ثابت ہوئی ہیں، وہ میرا میچ دیکھنے آئیں تو میں نے سنچری اسکور کی، یہ ان کی ہی وجہ سے ہے۔یاد رہے کہ بابر اعظم کی اس شاندار پرفارمنس پر پشاور زلمی کے مالک جاوید آفریدی نے انہیں قیمتی گاڑی تحفے میں دینے کا اعلان کیا ہے۔واضح رہے کہ گزشتہ روز پی ایس ایل کے 13ویں میچ میں پشاور زلمی نے اسلام آباد یونائیٹڈ کو 8 رنز سے شکست دی تھی۔