لاہور( این این آئی) لاہور ہائیکورٹ سے استعفیٰ دینے والے جسٹس (ر)شاہد جمیل نے کہا ہے کہ ان کا استعفیٰ دبا ئونہیں نظام کے خلاف بغاوت ہے ، فیصلے کرتے وقت ججز کو خوف ختم کرنا پڑے گا،کوئی غلط کام کرنے سے بہتر ہے آپ عہدہ چھوڑ دیں، چھوٹی سی تعداد نے بار، سیاسی جماعتوں، اداروں اور نظام کو یرغمال بنا رکھا ہے اور وہی سسٹم کو اپنی مرضی سے چلا رہے ہیں۔نجی ٹی وی کے مطابق لاہور میں وکلا ء کی تقریب سے خطاب کرتے ہوئے جسٹس (ر)شاہد جمیل نے کہا کہ کچھ ججز بے یقینی کی صورتحال کا شکار ہیں،
منصفی کے دوران کبھی دبا ئونہیں لیا ،دبا ئومیں آکر استعفیٰ نہیں دیا بلکہ میرا استعفیٰ نظام کے خلاف بغاوت ہے،یہ استعفیٰ ان لوگوں کیلئے مثال ہے جو خوف میں آکر فیصلے دے رہے ہیں ،اپنی عزت نفس پر سمجھوتہ نہ کرو ،اپنے استعفے کے متن میںشعر لکھنے کی وجہ یہی تھی ۔انہوںنے کہا کہ کچھ لوگوں نے پورے سسٹم کو یرغمال بنایا ہوا ہے ،وہ لوگ ہمارے اوپر مسلط ہیں ،اس ملک میں غیر یقینی کی صورتحال ہے ،اس طرح ہمارے کچھ ججز کے اندر بھی خوف کی صورت حال ہے ۔ انہوں نے کہا کہ لوگوں کو ڈر ہوتاہے نوکری چلی جائے گی ،چیف صاحب نہ ناراض ہو جائیں ،اس خوف سے باہر آ ئیں،اس خوف کی وجہ سے ہم آج ایک قوم نہیں بن سکے ۔
