اسلام آباد (این این آئی)نگراں وزیر داخلہ گوہر اعجاز نے کہا ہے کہ آپ کو فیصلوں پر اعتماد کرنا پڑے گا یہ آپ کی بہتری کیلئے کیے گئے، ہماری نیت میں اگر کھوٹ ہوتا تو الیکشن کا یہ رزلٹ نہ ہوتا، موبائل فون سروس اور انٹرنیٹ بند کرنا کوئی آسان فیصلہ نہیں تھا، یہ فیصلہ قوم کے بچوں کی حفاظت کیلئے کیا گیا۔نگراں وفاقی وزیر اطلاعات مرتضیٰ سولنگی کے ہمراہ پریس کانفرنس کرتے ہوئے گوہر اعجاز نے کہا کہ انتخابات سے ایک رات پہلے 28 شہادتیں ہوچکی تھیں، ہمیں انٹیلی جنس رپورٹ موصول ہوئی تھی،

دونوں حملے خود کش نہیں تھے، دونوں حملے ڈیٹونیٹر ڈیوائس سے کیے گئے۔گوہر اعجاز نے بتایا کہ ہم ہزاروں لوگوں کی موجودگی میں اپنے پولنگ اسٹیشنز کو کیسے محفوظ کر سکتے تھے، ہمارے لیے ہر صورت میں انسانی جانوں کی حفاظت اہم ہے۔انہوں نے کہا کہ اس الیکشن میں کروڑوں لوگوں نے ووٹ ڈالا، ہم جانتے تھے کہ انٹرنیٹ اور موبائل فون کی بندش پر تنقید کا سامنا کرنا پڑے گا، قانون نافذ کرنے والے اداروں نے سیکیورٹی کی صورتِ حال کو بہترین انداز میں دیکھا۔نگراں وزیر داخلہ نے کہا کہ گزشتہ روز کے واقعات میں 3 فوجی، 2 لیویز اور 7 پولیس کے جوان شہید ہوئے، 4 سویلین جاں بحق ہوئے جن میں 2 بچے بھی شامل ہیں۔