راولپنڈی( این این آئی) پاکستان تحریک انصاف کے رہنما بیرسٹر گوہر علی خان نے کہا ہے کہ غیر شرعی نکاح کیس میں سزا بانی پی ٹی آئی کے کردار پر کیچڑ اچھالنے کی کوشش ہے، سزا کے خلاف اسلام آباد ہائی کورٹ میں اپیل دائر کریں گے،ساتھ ہی بشری بی بی کو بنی گالہ سے اڈیالہ جیل منتقلی کی بھی درخواست دیں گے۔

بانی پی ٹی آئی اور بشری بی بی کو عدت کیس میں سزا سنائے جانے کے بعد اڈیالہ جیل میں صحافیوں سے گفتگو کرتے ہوئے انہوں نے کہا کہ دوپہر ایک بجے فیصلہ سنانا تھا لیکن ساڑھے تین بجے فیصلہ سنایا گیا، جو توقع تھی وہی ہوا، غیر اخلاقی قسم کے الزامات لگائے گئے اور ایک بے ہودہ کیس میں 7 سال قید دی گئی۔انہوں نے کہا کہ جج کو کہا کہ آپ کے لیے قربانیاں دی تھیں، آپ سے مایوسی ہوئی ہے یہ وہ کیس ہے جس کا نہ سر ہے اور نہ پیر، یہ کیس عون چوہدری کی خواہش پر بنایا گیا، مولوی کا فتوی ہے کہ عدت پوری ہوجاتی ہے جب خاتون کہے، دو دن کے اندر 14، 14گھنٹے سماعت کرکے کیس مکمل کیا گیا اور ہمیں ثبوت پیش کرنے کا موقع نہیں دیا گیا۔

بیرسٹر گوہر کا کہنا تھا کہ زبانی فیصلہ سنایا اور کاپی نہیں دی، یہ سب کچھ سیاسی مقاصد کے لیے ہورہا ہے یہ سب بانی پی ٹی آئی کے کردار پر کیچڑ اچھالنے کی کوشش ہے، بانی پی ٹی آئی نے کہا ہے کہ نیب کے پہلے کیس توشہ خانہ میں بھی ہمیں سزا ہوئی یعنی جس کی حکومت سازش کرکے ختم کی گئی اسی کے خلاف اب کیسز چلائے جارہے ہیں۔بیرسٹر گوہر علی خان نے کہا کہ پاکستان کی تاریخ میں صرف پی ٹی آئی کے انٹرا پارٹی انتخابات کو چیلنج کیا گیا پاکستان کی تاریخ میں ہماری پارٹی سے انتخابی نشان لیا گیا ہم انصاف کے لیے ہائی کورٹ جائیں گے، ہمیں امید ہے انصاف ملے گا۔ان کا کہنا تھا کہ جج کے پاس ججمنٹ نہیں تھی ملزمان کے پاس جو سپریم کورٹ کے فیصلے کی اسٹیڈنگ ہے وہ اس کیس میں لاگو نہیں ہوتی ہم نے کہا تھا کہ 1جنوری کو نکاح ہوا اور ایک تقریب میں دعا کے لیے فنکشن کیا ہے،

جج نے کہا نکاح نامہ بھی ایک ہے، پہلے نکاح نامہ کو مسترد کرتا ہوں اور دوسرے کو جائز سمجھتا ہوں، تیزی کے ساتھ سزا سنائی گئی اور زیادہ سے زیادہ سنائی گئی۔انہوں نے کہا کہ ہم اپنے گواہ کا نام نہیں بتا سکتے، ہم نے جج کو کہا تھا کہ گھر کے ایک اور بندے کو لاتے ہیں، اب بانی پی ٹی آئی اور بشری بی بی کو نکاح کرنے کی ضرورت نہیں ہے عدالت نے دوسرے نکاح کو جائز قرار دے دیا ہے۔انہوں نے کہا کہ اب ہم بشری بی بی کو بنی گالا سے واپس اڈیالہ جیل لانے کے لیے درخواست دیں گے، ہائی کورٹ میں بہت جلد درخواست دیں گے، کیوں کہ بشری بی بی کسی ڈیل کے تحت بنی گالا نہیں گئیں۔انہوں ںے مزید کہا کہ بانی پی ٹی آئی نے کہا ہے کہ ہزار سال بھی یہاں رہنا پڑا تو رہوں گا، عوام پرامن رہیں اور 8سفروری کو باہر نکلیں۔