راولپنڈی ( این این آئی)9 مئی کے مقدمات میںراولپنڈی کے حلقے این اے 53 میں پی ٹی آئی کے حمایت یافتہ امیدوار اجمل صابر،سابق رکن قومی اسمبلی صداقت عباسی ، واثق قیوم اور عمر تنویر عوامی مسلم لیگ کے سربراہ شیخ رشید کے خلاف وعدہ معاف گواہ بن گئے۔راولپنڈی کی انسداد دہشتگردی کی عدالت میں بانی چیئرمین پی ٹی آئی اور شیخ رشید کے خلاف 9 مئی کے مقدمات پر سماعت ہوئی ۔ سابق سپیکر پنجاب اسمبلی واثق قیوم، سابق ممبر قومی اسمبلی صداقت عباسی اور عمر تنویر بٹ وعدہ معاف گواہ بن گئے۔
نجی ٹی وی نے ذرائع کے حوالے سے کہا کہ صداقت عباسی، واثق قیوم اور عمر تنویر بٹ نے عدالت میں 154 کا بیان ریکارڈ کرا دیا، تینوں گواہوں نے اپنے بیان میں کہا کہ 9 مئی کی پلاننگ شیخ رشید، راجہ بشارت، راشد شفیق، اعجاز خان جازی، راشد حفیظ اور بانی چیئرمین پی ٹی آئی کی ایما ء پر کی گئی۔راولپنڈی کے حلقے این اے 53 میں پی ٹی آئی کے حمایت یافتہ امیدوار کرنل (ر)اجمل صابر بھی شیخ رشید کے خلاف وعدہ معاف گواہ بن گئے ، اجمل صابر نے پولیس کو بیان میں کہا کہ شیخ رشید نے 6 مئی کو لال حویلی میں اجلاس بلایا تھا جہاں 9 مئی کی پلاننگ کی گئی تھی۔عدالت نے بانی چیئرمین پی ٹی آئی، شیخ رشید اور راشد شفیق کو 6 فروری کو طلب کر لیا۔
