لاہور ( این این آئی) انسداد دہشت گردی عدالت نے سابق وفاقی وزیر فواد چودھری کو اشتہاری قرار دینے کا حکم کالعدم قرار دیتے ہوئے تمام مقدمات میں ایک ساتھ گرفتاری ڈالنے کا حکم دے دیا۔لاہور کی انسداد دہشت گردی عدالت کے جج محمد نوید اقبال نے فواد چوہدری کی درخواست پر سماعت کی ۔فواد چوہدری نے ظفر اقبال ایڈووکیٹ کی وساطت سے درخواست دائر کر رکھی ہے ۔ وکیل نے موقف اپنایا کہ فواد چوہدری گزشتہ سال 4نومبر کو تھانہ ابپارہ اسلام آباد کے مقدمہ میں گرفتار کیا گیا ۔

عدالت نے فواد چوہدری کو پیش نہ ہونے کی بنیاد پر دو مقدمات میں اشتہاری قرار دیا گیا۔ ماڈل ٹائون تھانہ کے مقدمہ نمبر 366/23میں 9دسمبر 2023کو اور مقدمہ نمبر 367/23میں 12دسمبر 2023کو اشتہاری قرار دیا گیا۔وکیل نے دلائل دیئے کہ فواد چوہدری اڈیالہ جیل میں زیر حراست ہیں لہٰذا زیر حراست ملزم کو اشتہاری قرار نہیں دیا جا سکتا ہے ۔ استدعا ہے کہ عدالت اشتہاری قرار دینے کا فیصلہ کالعدم قرار دے،تمام مقدمات میں ایک ہی مرتبہ گرفتاری ڈالنے کا حکم دیا جائے اور فواد چوہدری سے تمام مقدمات کی تحقیقات اڈیالہ جیل میں کرنے کا حکم دیا جائے۔عدالت نے دلائل سننے کے بعد فواد چودھری کو اشتہاری قرار دینے کا حکم کالعدم قرار دیدیا جبکہ 9اور 10مئی کے مقدمات کی تفصیلات فراہم کرنے کا حکم دیتے ہوئے فواد چودھری کی تمام مقدمات میں ایک ساتھ گرفتاری ڈالنے کا حکم بھی دے دیا۔