اسلام آباد (این این آئی)توشہ خانہ تحائف کی درست قیمت جانچنے کا نظام موجود نہ ہونے کا انکشاف ہوا ہے ۔نیب کی تحقیقات کے بعد جاری کی گئی رپورٹ میں سعودی ولی عہد سے بانی پی ٹی آئی اور بشری بی بی کو ملنے والے تحائف کی قیمت اور ادائیگی کی تفصیلات کے حوالے سے انکشاف کیا گیا ہے،نیب کی یہ رپورٹ 31 دسمبر 2023 کو منظرِ عام پر آئی تھی،نیب کی رپورٹ میں تحائف کی درست قیمت جانچنے کا نظام موجود نہ ہونے کا انکشاف کیا گیا ہے،

نیب کی رپورٹ کے مطابق 3 ارب 16 کروڑ روپے کے تحفوں کی قیمت پاکستان میں 1 کروڑ 80 لاکھ روپے لگائی گئی۔رپورٹ میں کہا گیا کہ نصف رقم 90 لاکھ ادا کر کے تحائف بانی پی ٹی آئی اور بشریٰ بی بی نے رکھ لیے۔نیب کی رپورٹ میں بتایا گیا ہے کہ پاکستان میں کوئی ادارہ سعودی شہزادے سے ملے گراف جیولری سیٹ کی قیمت نہ جان سکا۔رپورٹ میں نیب نے بتایا کہ دبئی سے تخمینہ لگوانے پر معلوم ہوا کہ خزانے کو 1 ارب 57 کروڑ 37 لاکھ روپے کا نقصان پہنچا ہے۔نیب کی رپورٹ میں کہا گیا ہے کہ ایف بی آر اور کولیکٹوریٹ آف کسٹمز کی کمیٹی نے قیمت لگانے سے معذوری ظاہر کی۔