لاہور ( این این آئی) امیرجماعت اسلامی سراج الحق نے بانی چیئرمین پی ٹی آئی اور شاہ محمود قریشی کو سائفر کیس میں دس دس سال سزا پر انتہائی افسوس کا اظہار کیا ہے۔امیر جماعت اسلامی نے خصوصی عدالت کے فیصلے پر ردعمل کا اظہار کرتے ہوئے کہا کہ مقدمہ کی سماعت کھلی عدالت میں ہونی چاہیے تھی تاکہ عدل و انصاف کے مروجہ طریقے پورے ہوتے۔
انہوں نے سائفر کیس پر آزاد غیر جانبدار کمیشن کا مطالبہ کیا ہے اور کہا ہے کہ حقائق پوری قوم کے سامنے آنے چاہئیں ۔سراج الحق کا کہنا ہے کہ ملکی معاملات میں امریکی مداخلت گزشتہ چھہتر برسوں سے جاری ہے۔ تاہم یہ پہلی بار ہوا ہے کہ امریکی مداخلت ہمارے سرکاری حلقوں میں زیر بحث آئی ہے ۔پی ٹی آئی لیڈران کو فیصلے کے خلاف اپیل کا حق حاصل ہے۔ انہوں نے کہا کہ فیصلے آئین، مروجہ قوانین اور قوائد و ضوابط کے مطابق ہونے چاہئیں ۔جماعت اسلامی ملک میں آئین و قانون کی حقیقی بالادستی کے لیے جدوجہد جاری رکھے گی۔
