لاہور ( این این آئی) لاہور ہائیکورٹ نے انتخابی نشان سے متعلق درخواست پر رہنما تحریک انصاف و سابق وزیر اعلیٰ پنجاب چودھری پرویز الٰہی کے حلقہ پی پی 32 سے بیلٹ پیپر کی چھپائی روکنے کا حکم دے دیا۔لاہور ہائیکورٹ کے جسٹس شاہد بلال حسن نے چودھری پرویز الٰہی کی جانب سے انتخابی نشان گدھا گاڑی الاٹ کرنے کے خلاف درخواست پر سماعت کی۔

درخواست میں موقف اختیار کیا گیا کہ درخواست گزار پی پی 32گجرات سے صوبائی اسمبلی کا الیکشن لڑ رہے ہیں، سپریم کورٹ نے الیکشن لڑنے کی اجازت دی، اب انتخابی نشان مور الاٹ نہیں کیا جا رہا،استدعا ہے کہ انتخابی نشان مور الاٹ کرنے کا حکم دیا جائے۔عدالت نے درخواست کے حتمی فیصلے تک بیلٹ پیپرز کی چھپائی روکنے کا حکم دے دیا۔جبکہ الیکشن کمیشن کو منگل کے لئے نوٹس جاری کرکے جواب طلب کرلیا۔