مری(این این آئی)ملکہ کوہسار مری میں موسم سرما کی پہلی برفباری سے سردی کی شدت میں اضافہ ہوگیا ۔تفصیلا ت کے مطابق ملکہ کوہسار مری میں موسم سرما کی پہلی برفباری سے سردی کی شدت میں اضافہ ہوگیا ہے جبکہ مری میں برف باری کے بعد سڑک سے برف ہٹانے کا کام شروع کردیا گیا ۔ضلعی انتظامیہ نے بتایا کہ رات سے اب تک 5انچ برف پڑچکی ہے،

سڑکوں سے برف ہٹانے کا کام شروع کردیا گیا ہے جس کے باعث ٹریفک معمول کے مطابق جاری ہے۔ڈپٹی کمشنر مری آغا ظہیر عباس شیرازی نے جھیکا گلی،کشمیر پوائنٹ سمیت دیگر مقامات پر انتظامات کا جائزہ لیا۔ انہوںنے کہاکہ تمام اہلکار اور مشینری فعال ہے اور برف کو جلد پگھلانے اور صفائی کیلئے سڑکوں پر نمک کا استعمال بھی کیا جا رہا ہے۔انہوںنے بتایا کہ کسی بھی ہنگامی صورتحال کیلئے کنٹرول روم بھی قائم کردیا گیا ہے۔انتظامیہ نے سیاحوں کیلئے ایڈوائرزی بھی جاری کردی ہے جس میں شہریوں کو غیر ضروری سفر سے گریز کرنے کی ہدایت کی گئی ہے۔