لاہور( این این آئی) انسداد دہشتگردی عدالت نے مسلم لیگ (ن) آفس جلانے کے کیس میں صنم جاوید اور محمد تنویر کی درخواست ضمانت منظور کرلی۔انسداد دہشت گردی عدالت کے جج ارشد جاوید چدھڑ نے صنم جاوید اور محمد تنویر کی بعدازگرفتاری ضمانت پر محفوظ فیصلہ سنایا ۔وکیل نے عدالت میں موقف اختیار کیاکہ ملزمہ صنم جاوید کو چھ ماہ بعد اس مقدمہ میں ملوث کیا گیا ، ڈپٹی پراسیکیوٹر عبد الجبار ڈوگر نے ضمانت مسترد کرنے کی استدعا کی۔

پراسیکیوٹر نے کہا کہ ملزمہ صنم جاوید نے عوام کو جلا گھیرا پر اکسایا ، انسداد دہشت گردی عدالت کے جج ارشد جاوید نے فیصلہ سناتے ہوئے درخواست ضمانت منظور کرلی۔تھانہ ماڈل ٹائون پولیس نے پی ٹی آئی کارکن صنم جاوید کے خلاف مسلم لیگ (ن) کا دفتر جلانے کا مقدمہ درج کر رکھا ہے۔ بعدازاں پولیس نے صنم جاوید کو تھانہ شادمان میں درج مقدمے میں گرفتار کرلیا۔انویسٹی گیشن پولیس نے صنم جاوید کودہشت گردی کے مقدمہ نمبر 768میں گرفتار کیا ہے۔