لاہور( این این آئی)محکمہ داخلہ پنجاب نے تمام اضلاع کی انتظامیہ اور پولیس کو انتخابات سے پہلے اور انتخابات کے روز خطرے کے پیش نظر مراسلہ ارسال کر دیا ۔ مراسلے کے مطابق موجودہ سکیورٹی کی صورتحال اور خطرات کے پیش نظر ہدایات پر عمل کیا جائے اور انتخابات کو پرامن بنانے کے لیے ضروری ہے کہ فول پروف انتظامات ہوں۔محکمہ داخلہ پنجاب کے مراسلے میں کہا گیا ہے کہ دہشتگرد گروپ اور غیر جمہوری قوتیں الیکشن میں خلل ڈال سکتی ہیں،

غیر یقینی اور عدم استحکام پیدا کرنے کا مقصد الیکشن ملتوی کرانا ہوسکتا ہے۔مراسلے کے مطابق تخریب کاری کا مقصد جمہوری عمل کو پٹری سے اتارنا ہو سکتا ہے، ممنوعہ اور کالعدم مذہبی تنظیمیں اہم سیاسی رہنمائوں پر حملہ کرسکتی ہیں جبکہ ووٹرز میں دہشت پیدا کرنے کے لیے سیاسی جلسوں پر بھی حملے ہو سکتے ہیں۔مراسلے میں خدشہ ظاہر کیا گیا ہے کہ دہشتگرد اہم سیاسی رہنماں کو اغواء کر کے یرغمال بنا سکتے ہیں،پولنگ کے دن بیلٹ پیپر، باکس اور انتخابی نتائج چھینے جا سکتے ہیں۔محکمہ داخلہ پنجاب کے مطابق فوج اور رینجرز کی تعیناتی کے لیے علاقوں کی نشاندہی کر کے 28 جنوری تک رپورٹ دی جائے۔