لاہور ( این این آئی) پنجاب پولیس نے الیکشن کے دوران سکیورٹی ڈیوٹی کی نفری کے کھانے پینے، پٹرول اور دیگر خریداری کے لئے ایک ارب 19کروڑ مانگ لئے۔حکام کے مطابق ایک 1رب 19کروڑ کے فنڈز میں 53کروڑ پٹرول کی مد میں جبکہ 66کروڑ کھانے پینے وسکیورٹی آلات کی خریداری کی مد میں مانگے گئے ہیں۔پولیس نے49817پولنگ سٹیشنز میں ازسر نوسروے میں 5624انتہائی حساس۔14ہزار72حساس اور30ہزارکے قریب نارمل ڈیکلئیر کئے گئے ہیں۔

ازسر نو سروے کر کے پولنگ سٹیشنز کی سکیم بھی الیکشن کمیشن کو بھجوا دی گئی، الیکشن کی مانیٹرنگ کے لیے آئی جی آفس میں کنٹرول روم بھی بنا دیا گیا۔حکام نے بتایا کہ کنٹرول روم اے آئی جی آپریشنز کی سربراہی میں کام کرے گا، کنٹرول روم میں 15اضافی ڈیٹا انٹری آپریٹرز تعینات کردیئے گئے ہیں، کنٹرول روم سے جلسے جلوسوں کے دوران تمام خلاف ورزیوں کے حوالے سے رپورٹس لی جائیں گی۔پولیس حکام کا مزید کہنا ہے کہ تمام اضلاع میں انسپکٹر رینک کے افسران کنٹرول روم میں بروقت رپورٹس کے لئے فوکل پرسنز مقررکر دیئے گئے ہیں، الیکشن ڈے پر ڈیوٹی کے لئے ایک لاکھ 30ہزار جوان فرائض سر انجام دیں گے۔