اسلام آباد (این این آئی)الیکشن ملتوی کروانے کی ایک اور قرارداد سینیٹ سیکرٹریٹ میں جمع کرا دی گئی۔یہ قرارداد سینیٹر ہلال الرحمن نے جمع کرائی جو فاٹا سے آزاد سینیٹر ہیں۔قرارداد میں کہا گیا کہ شدید سردی اور برفباری خیبرپختونخوا میں شہریوں کو ساز گار ماحول میں ووٹ ڈالنے سے روک رہی ہے،

امیدواروں کو الیکشن مہم چلانے میں بھی بے شمار چیلنجز کا سامنا ہے۔قرارداد میں کہا گیا کہ خیبرپختونخوا میں سیکیورٹی خدشات کے باعث امیدواروں کو دہشتگردوں کے حملے کا خدشہ ہے، صوبے کے ووٹرز اور امیدواروں میں احساسِ محرومی ہے۔قرارداد میں کہا گیا کہ خیبرپختونخوا میں الیکشن کی تاریخ غیر موزوں ثابت ہو رہی ہے، عام انتخابات کو 8 فروری کے بجائے موزوں تاریخ تک ملتوی کیا جائے۔