اسلام آباد(این این آئی)حکومت نے قومی سلامتی کمیٹی کا اجلاس دوبارہ بلانے اور پی ٹی آئی سے مذاکرات کے حوالے سے بلاول بھٹو کی ثالثی کی پیش کش کو قبول کرتے ہوئے ان کو ہی یہ ذمہ داری سونپ دی۔نجی ٹی وی سے گفتگو کرتے ہوئے وزیراعظم کے مشیر رانا ثناء اللہ نے کہاہے کہ بلاول بھٹو اگر تحریک انصاف سے شرکت کی یقین دہانی کرالیں تو حکومت قومی سلامتی کا اجلاس دوبارہ بلانے کو تیار ہے۔انہوں نے کہا کہ بلاول بھٹو خود حکومت کا حصہ ہے اگر وہ ثالثی کا تحریک انصاف اور حکومت کے درمیان ثالثی کا کردار ادا کرتے ہیں اور یہ مذاکرات کامیاب ہوجاتے ہیں تو یہ ہماری بڑی کامیابی ہوگی۔پیکا قانون سے متعلق سوال پر رانا ثناء اللہ نے کہا کہ پیکاٹ ایکٹ ضروری ہوگیا ہے تاہم اس کے غلط استعمال کی شکایات جو سامنے آئیں وہ بھی جائز ہیں اور ان مسائل مل بیٹھ کر بات چیت سے حل کیا جاسکتا ہے۔

لاہور ( این این آئی) پاکستان پیپلزپارٹی کے چیئرمین بلاول بھٹو زرداری نے بلوچستان اور خیبرپختونخوا کے امن و امان پر خصوصی توجہ دینے اور قومی معاملات پر اتفاق رائے پیدا کرنے کو ناگزیر قرار دیتے ہوئے کہا ہے کہ ملک میں نفرت اور تقسیم کی سیاست ہے، ملکی مفادات کے لئے اجتماعی فیصلے کیے جائیں جس کے لئے سب کو متحد ہونا ہو گا ۔ ان خیالات کا اظہار انہوں نے گورنر ہائوس لاہور میں گرینڈ افطار کے موقع پر خطاب کرتے ہوئے کیا ۔ اس موقع پر گورنر پنجاب سردار سلیم حیدر خان سمیت پیپلز پارٹی کے عہدیداران اور کارکنوں کی کثیر تعداد نے شرکت کی ۔ بلاول بھٹو زرداری نے بلوچستان اور خیبرپختونخوا کی صورت حال پر تشویش کا اظہار کرتے ہوئے کہا کہ دہشت گردی عروج پر ہے اور سیاست تقسیم کا شکار ہے، دہشت گرد بلوچستان اور خیبرپختونخوا سرگرم ہیں۔پوری قوم اور تمام جماعتوں کو دہشت گردوں سے مقابلے کے لیے متحد ہونا ہوگا۔تمام جماعتوں کو ملک و قوم کے لئے ایک جگہ پر جمع ہونا ہوگا، اپوزیشن کو سیاست کرنی ہے تو وہ عوامی ایشوز پر بات کرے کیونکہ اب وقت ہے کہ ملکی مفادات کے لئے اجتماعی فیصلے کیے جائیں۔ہمیں بلوچستان اور خیبرپختونخوا پر خصوصی توجہ دینے کی ضرورت ہے۔انہوں نے کہا کہ دہشت گردی کے پیچھے بین الاقوامی طاقتیں ہوں گی، دہشت گردوں اور ان کے سہولت کاروں کا مقابلہ کریں گے۔انہوںنے کہا کہ پاکستان مشکلات کا شکار ہے ،عوام کے کئی مسائل ہیں ان میں ایک دہشت گردی اور معاشی بحران ہے ، عوام غربت اور بیروزگاری کا مقابلہ کررہے ہیں،پاکستان کے عوام سیاست دانوں کی طر ف دیکھ رہے ہیں،عوام کے مسائل کا حل ترجیح ہونی چاہیے، قومی ایشو پر اتفاق رائے پیدا کرنا ناگزیز ہے۔ بلاول بھٹو نے مزید کہا کہ ہمیں بلوچستان اور خیبرپختونخوا میں امن و امان پر خصوصی توجہ دینے کی ضرورت ہے۔اپوزیشن ذاتی مفادات کے بجائے عوامی ایشو پر سیاست کرے، کچھ سیاسی جماعتوں نے قومی سکیورٹی کونسل کے اجلاس میں شرکت نہیں کی جو کہ افسوسناک ہے، اپوزیشن پارٹی سے اپیل ہے کہ لیڈر کی رہائی کے علاوہ بھی مسائل پر توجہ دے،قومی ایشوز پر اتفاق رائے پیدا کرنا ناگزیر ہے، تمام جماعتوں کو ذاتی مسائل کی بجائے ملک اور قوم کے لیے اکٹھا ہونا ہوگا۔،وزیراعظم سے بھی اپیل ہے ایک بار پھر قومی سلامتی پر اجلاس بلائیں، حکومت سیاسی جماعتوں کو قومی سلامتی امور پر یکجا کرے، ملکی مفاد میں اجتماعی فیصلے لینا ہوں گے۔چیئرمین پیپلزپارٹی نے کہا کہ موجودہ صورتحال میں پیپلزپارٹی ایک ایسے مقام پر کھڑی ہے، ہم حکومت سے بات کرسکتے ہیں اور کوشش کرسکتے ہیں کہ ملکی مفاد میں اجتماعی فیصلے لیے جائیں۔بلاول بھٹو نے کہا کہ ہم اپوزیشن کو بھی دعوت دیتے ہیں کہ وہ اپنی تنگ نظری کی سیاست چھوڑ کر عوام کے بارے میں سوچے۔

راولپنڈی (این این آئی)عید الفطر پر طلبا کو 9دن کی تعطیلات مل گئیں ہیں۔وزارت تعلیم کی جانب سے جاری نوٹیفکیشن کے مطابق تعلیمی اداروں میں عید کی چھٹیاں 29 مارچ سے5اپریل تک تعطیلات ہوں گی۔چھٹیوں کے دوران نویں کلاس کے بورڈ امتحانات بھی نہیں ہوں گے جبکہ عید الفطر کے دن سے پورا ہفتہ سرکاری پرائیویٹ سکولز بند رہیں گے۔

اسلام آباد(این این آئی)وفاقی وزیر ریلوے حنیف عباسی نے کہا ہے کہ بولان میں دھماکے سے متاثرہ ریلوے ٹریک کی مرمت کردی گئی ہے، سیکیورٹی کلیئرنس کے بعد کوئٹہ ٹرینوں کی آمد ورفت بحال ہوجائے گی۔ ایک انٹرویو میں وفاقی وزیر ریلوے نے کہا کہ ریلوے پولیس کی اپ گریڈیشن کیلئے پلان تیار کرلیا ہے،وزیراعلیٰ علی امین گنڈاپور ڈرے ہوئے ہیں، بانی پی ٹی آئی ہی 40ہزار سے 45ہزار دہشتگردوں کو لائے تھے۔ انہوںنے کہاکہ آج جو سیکیورٹی حالات ہیں اس کی وجہ ان دہشتگردوں کو واپس لانا بھی ہے، قومی سلامتی کمیٹی کے اجلاس میں شرکت نہ کر کے دہشتگردوں کے موقف کو تقویت دی گئی۔

ساہیوال( این این آئی) بانی تحریک انصاف پاکستان کی اپیل پر 23مارچ کو یوم پاکستان پر یوم آزادی کے حوالہ سے گھروں اور دفاتر پر پاکستان کے پرچم لہرانے اور ریلیاں نکالنے سے روکنے کے لیے پولیس نے تحریک انصاف کے راہنمائوں اور عہدیداروں شکیل احمد خاں نیازی، چوہدری آصف علی ، رضوان مظفر شاہ، محمد یارڈمرہ، رانا آفتاب احمد، ٹکٹ ہولڈر احمد صفدر خاں، شہباز خاں مردانہ اور مہر بہاول شیر سیال کے گھروں پر پولیس نے چھاپے مارے ۔ تاہم گرفتاریاں نہ ہوسکیںجبکہ تحریک انصاف کے جھنڈے اور بینر پولیس لے گئی،پولیس کی سخت ناکہ بندی کی وجہ سے تحریک انصاف کے کارکن اور راہنما اپنے گھروں پر قومی پرچم لہرانے میں بھی ناکام رہے۔بھنڈاری چوک میں ضلعی آفس کے اردگرد پولیس کی بھاری نفری تعینات تھی اور پولیس گشت کرتی رہی ۔ اس لیے یوم آزادی کے حوالہ سے ساہیوال میں تحریک انصاف کوئی ریلی نہ نکال سکی اور قومی پرچم لہرانے کی تقریب بھی نہ کرسکی۔تحریک انصاف موبلائزیشن کمیٹی تحصیل ساہیوال کے کوآرڈینیٹر سیدرضوان مظفر شاہ نے کہا ہے کہ ہم ان اوچھے ہتھکنڈوں سے گھبرانے والے نہیں ہیں ۔ ہم اپنے کپتان کے ساتھ ڈٹ کے کھڑے ہیں۔تاہم اولڈ ایج ہوم میں مقیم افراد کے ہمراہ ڈپٹی ڈائریکٹر سوشل ویلفیئر محمدعباس چوہان نے یوم پاکستان کے موقع پر پرچم کشائی کی اور پاکستان کی سلامتی اور استحقام کے لیے دعا مانگی گئی۔ جس میں محکمہ سماجی بہبود کے افسروں اور اہلکاروں نے شرکت کی۔